ماہنامہ انوار مدینہ لاہور مئی 2008 |
اكستان |
 |
عو ر توں کے رُوحانی امراض ( از اِفادات : حکیم الامت حضرت مولانا اشرف علی تھانوی رحمة اللہ علیہ ) رسوم کی پابندی میں بوڑھی عورتوں کی کوتاہی : بعض عورتوں نے مجھ سے مرید ہونا چاہا تو میں نے اُن سے شرط لگادی کہ رسمیں چھوڑنا پڑیں گی۔ کہنے لگیں کہ میرے کچھ ہے ہی نہیں ،نہ بال نہ بچہ میں کیار سمیں کروں گی۔ میں نے کہا کروگی تو نہیں لیکن صلاح مشورہ تو ضرور دو گی ۔یہ پرانی بوڑھیاں رسموں کے معاملہ میں گویا شیطان کی خالہ ہوتی ہیں۔خود اگر نہ کریں تو دُوسروں کو بتلاتی ہیں ۔چنانچہ میں دیکھتا ہوں کہ جن عورتوں کی اولاد نہیں وہ خود تو کچھ نہیں کرتیں لیکن دُوسروں کو تعلیم دیتی ہیں۔ کوئی پوچھے اُس کو کیا شامت سو ار ہوئی ہے ۔اُس کو تو یہ مناسب تھا کہ تسبیح لے کر مصلیٰ پر بیٹھ جاتی کچھ فکر تو ہے نہیں۔ اللہ تعالیٰ نے سب فکروں سے خالی رکھا تھا۔(کاش )وقت کی قدر جانیں مگر یہ ہر گز نہ ہو گا بس یہ مشغلہ ہو گا کہ کسی کی غیبت کر رہی ہیں ۔کسی کو رائے دے رہی ہیں گویا یہ بڑی بنتی ہیں۔بات بات میں دخل دیتی ہیں۔ یاد رکھو زیادہ بولنے سے کچھ عزت نہیں ہوتی ۔عزت اُسی عورت کی ہوتی ہے جو خاموش رہے ۔ اگر خاموش ہو کر ایک جگہ بیٹھ کر اللہ کا نام لے (تسبیح پڑھے )تو اِس کی تو بڑی قدر اور وقعت ہوتی ہے ۔مگر باتیں کرنے کی جن کو عادت ہو جاتی ہے یہ کیسے چھوٹ سکتی ہے۔خواہ ذلت خواری ہو کوئی اِن کی بات بھی کان لگا کر نہ سنے لیکن اِن کو اپنی ہانکنے سے کام ۔عورتیں اِس کو سن کر کہا کرتیں ہیں کہ بیٹھ تو جائیں لیکن کوئی چین تو لینے دے ۔میں کہتا ہوں کہ تم اپنے منہ کو جب گوند لگا کر بیٹھو گی (یعنی بالکل خاموش رہو گی )تو کیا کسی کا سر پھر ا ہے (کوئی پاگل ہے )جو تم سے مزاحمت (مقابلہ )کرے۔زیادہ دَنگاہ فساد اور گناہ بولنے ہی سے ہوتے ہیں ۔ واقعی زیادہ گناہ ہم لوگوں سے اِس زبان ہی کی بدولت ہوتے ہیں۔اِس مضمون کو مرد اور عورتیں سب یاد رکھیں لیکن آج کل مشکل یہ ہے کہ آنسو بہالیں گے آہیں بھر لیں گے اور سن کر کہیں گے کہ بس جی ہمارا کیا ٹھکانہ ہے ۔ صاحبو! اِن باتوں سے کام نہیں چلتا کام تو کرنے ہی سے ہوتا ہے پس کام کرو اور باتیں نہ بگھارو۔