حضرت اقدس مولانا محمد باقر حسین صاحب رحمہ اللہ
بابرکت زندگی کی ایک جھلک
ولادت، وطن اور خاندان:
ضلع سنت کبیر (سابق ضلع بستی) کے آباد وشاداب مسلم اکثریتی خطے میں واقع ایک چھوٹے سے گاؤں ’’مدارپور‘‘ میں ۱۹۳۶ء میں حضرت اقدس مولانا محمد باقر حسین صاحب رحمۃ اللہ علیہ نے اپنی آنکھیں کھولیں ، حضرت کے والد ماجد محترم جناب محمد اسماعیل صاحب مرحوم انتہائی صالح ومتدین انسان تھے، بچپن ہی میں حضرت کو اپنے والد کی جدائی کا صدمہ سہنا پڑا، اس طرح یتیمی کی زندگی گذاری، حضرت کی والدہ محترمہ مریم صاحبہ مرحومہ نے بے حد محبت سے اپنے لخت جگر کی تربیت کی، اور دینی تعلیم کے لئے ان کا انتخاب کیا، حضرت کی مبارک زندگی کی بے نظیر دینی وعلمی خدمات میں اُن کی والدہ کی دعائے نیم شبی، آہ سحرگاہی اور مؤمنانہ تربیت کا نمایاں اور اولین کردار ہے۔ صالح، متدین، شریف النفس، سیدھے سادھے، مخلص وبے ضرر خانوادے کا چشم وچراغ ہونے کی وجہ سے حضرت کی ذات وصفات میں (رسوخ علمی اور اکابر سے تعلق وربط کے اثرات کے پہلو بہ پہلو) نسبی ونسلی اثرات کے لحاظ سے بھی صلاح، تدین، کریم النفسی، شرافت انسانی، بے لوثی، اخلاص، خیرخواہی، ہم دردی، بے نفسی، نافعیت اور دوسروں کی بدخواہی، ایذا اور ضرر رسانی کی تمام ظاہری، باطنی، خفیہ، علانیہ، چھوٹی بڑی، محسوس وغیر محسوس شکلوں اور طریقوں سے آخری حد تک گریز اور اجتناب جیسے اوصافِ عالیہ کا رنگ اس طرح غالب اور نمایاں تھا کہ تھوڑی دیر کے لئے بھی ملنے والا اسے محسوس کئے اور اس سے متأثر ہوئے بغیر نہیں رہ پاتا تھا۔
