قلب عارف کی آہ و فغاں |
ہم نوٹ : |
 |
تسخیر مہر و ماہ مبارک تجھے مگر دل میں اگر نہیں تو کہیں روشنی نہیں یعنی اے یورپ کے سائنس دانو! چاند پر چلے جاؤیا سورج کی سیر کرلو، اگر دل میں ایمان کا نور، ایمان کی روشنی ، اللہ کے نام سے سکون اور چین نہیں ہے تو جہاں جاؤ گے بے چین ا ور پریشان رہو گے۔ ضَاقَتۡ عَلَیۡہِمُ الۡاَرۡضُ بِمَا رَحُبَتۡ باوجود اپنی وسعت کے پوری دنیا ان کے لیے تاریک ہوگئی،یعنی اگر تقویٰ سے نہیں رہو گے تو زمین پر رہو یا چاند پر، گھر میں رہو یا باہر کہیں چین اور سکون نہیں پاؤ گے۔ اب اس آیت کو اس حدیث سے ملاؤ، وَلْیَسَعْکَ بَیْتُکَ تمہارا گھر جب وسیع ہوگا، جب تم تقویٰ سے رہو گے اور خالق ارض و سماء کو یاد کرو گے تو خود تمہارے دل میں ارض و سماء ہوں گے اور وہ تمہارے دل کی قید میں ہوں گے، دل میں قیدی کی طرح رہیں گے۔مولانا رومی فرماتے ہیں ؎بادہ در جوشش گدائے جوش ماست اے دنیا والو! جلال الدین رومی کی زبان سے سنو، اللہ کے نام کی محبت کا جو نشہ ہے شراب اس کی محتاج اور گدا ہے، اس کے سامنے کوئی حقیقت نہیں رکھتی، یہ وہ نشہ ہے کہ اللہ کے نام پر تلواریں چلتی ہیں،بندے شہادت کا خون پیتے ہیں اور شہید ہوتے ہیں،اور شراب کا نشہ وہ ہے کہ ذرا سی ترش یعنی کھٹی چیز پلادو تو سب نشہ ختم ہوجاتا ہے۔ اس شراب کے فوراً بعد موتنا ضروری ہے،جتنے شرابی ہیں سب کو دیکھو بوتل چڑھاتے ہی فوراً موتتے ہیں۔ اور اللہ کے عاشقوں کو اللہ کی محبت کا جو نشہ ہے اس سے ان کے سینوں میں انوار کا دریا بہتا ہے ؎شاہوں کے سروں میں تاجِ گراں سے درد سا اکثر رہتاہے اور اہلِ وفا کے سینوں میں اک نور کا دریا بہتا ہے تو حدیث وَلْیَسَعْکَ بَیْتُکَ کی شرح سمجھ میں آگئی؟اپنا گھر تم کو وسیع کب معلوم ہوگا، اپنے گھر کو وسیع کیسے بناؤگے؟ نورِ تقویٰ سے اور اللہ کے نام سے۔ جب دل میں اللہ آئے گا تو زمین و آسمان تمہارے دل کے قیدی بن جائیں گے۔ اسی کو مولانا رومی فرماتے ہیں ؎بادہ در جوشش گدائے جوش ماست چرخ در گردش اسیر ہوش ماست