لذت اعتراف قصور |
ہم نوٹ : |
|
اَللّٰھُمَّ بَارِکْ فِیْ مَالِہٖ وَ وَلَدِہٖ وَ اَطِلْ عُمْرَہٗ وَ اغْفِرْ ذَنْبَہٗ 6؎تو سرورِ عالم صلی اﷲ علیہ وسلم نے اِتِّبَاعًا لِرَبِّہٖ مال کو پہلے بیان فرمایا۔ یہ چار دعائیں اتنی جامع ہیں کہ ان میں دنیا بھی ہے اور آخرت بھی، اور اس دعا کا اثر یہ ہوا کہ حضرت انس رضی اﷲ تعالیٰ عنہ نے فرمایا کہ میرے مال میں اتنی برکت ہوئی کہ کھجور کا جو درخت میں لگاتا تھا اس میں دو فصل آتی تھیں اور میرے علاوہ تمام صحابہ کی ایک فصل ہوتی تھی تو بعض صحابہ نے سوچا یہ برکتی آدمی ہیں تو اپنے لگائے ہوئے درخت کے بارے میں ان سے کہا کہ تم اکھاڑ کر دوبارہ لگا دو تو حضرت انس رضی اللہ تعالیٰ عنہ نے جب ان کے لگائے ہوئے درخت اُکھاڑ کر دوبارہ لگائے تو ان میں بھی دو بار فصل آنے لگی، اور حضرت انس رضی اللہ عنہ کے ہاں اولاد اتنی ہوئی کہ فرمایا میں نے دو کم سو اولاد اپنے ہاتھوں سے دفن کیں دَفَنْتُ مِنْ صُلْبِیْ مِاَۃً اِلَّا اثْنَیْنِ یعنی اٹھانوے، یہ عربی کی بلاغت ہے، ورنہ یہ فرماتے کہ فَاِنِّیْ دَفَنْتُ مِنْ صُلْبِیْ ثَمَانِیَۃً وَّتِسْعِیْنَ ہم نے اٹھانوے اولاد دفن کیں لیکن طرزِ بیان یہ ہے دَفَنْتُ مِنْ صُلْبِیْ مِاَۃً اِلَّا اثْنَیْنِ ہر زبان کے بولنے کا الگ طریقہ ہوتا ہے۔ اور عمر کی برکت کی دعا ایسی قبول ہوئی کہ فرماتے ہیں کہ بَقِیْتُ حَتّٰی سَئِمْتُ الْحَیَاۃَ ۔ سَئِمَ یَسْئَمُ کے معنیٰ تھکنے کے آتے ہیں جیسے فرشتوں کے بارے میں اﷲ پاک فرماتے ہیں لَا یَسْئَمُوْنَ یہ تھکتے نہیں ہیں، رات دن یہ سبحان اﷲ پڑھتے رہتے ہیں، نہ ان کو سونے کی ضرورت ہے، نہ آرام کی، عجیب مخلوق ہیں یہ۔ اسی لیے فرشتوں کے لیے نیند نہیں ہے کیوں کہ نیند تھکاوٹ کو دور کرنے کے لیے ہے اور ان کو تھکا وٹ نہیں ہوتی۔ تو حضرت انس نے فرمایا کہ میں اتنا زندہ رہا کہ زندگی سے تھک گیا اٰخِرُ مَنْ مَّاتَ مِنَ الصَّحَابَۃِ بِالْبَصَرَۃِ حضرت انس کے انتقال کے بعد بصرہ صحابہ سے خالی ہوگیا، اور چوتھی دعا وَاغْفِرْ ذَنْبَہٗ کے بارے میں فرمایا کہ جب تین دعائیں قبول ہوگئیں تو اَرْجُوْ الرَّابِعَۃَ 7؎ چوتھی دعا کی قبولیت کی بھی امید ہے۔ _____________________________________________ 6؎صحیح مسلم:939/2(6378)،باب دعوۃ النبی لخادمہ بطول العمر،المکتبۃ المظھریۃ۔ذکرہ بلفظ اکثر مالہ وولدہ ،وبارک لہ فیمااعطیتہٗ 7؎مرقاۃ المفاتیح:139/1، کتابُ الایمان،دارالکتب العلمیۃ،بیروت