کرامت تقوی |
ہم نوٹ : |
 |
گناہوں سے بچنا اور ایمان پر لوٹ آنا ان چیزوں کے لیے تین نسخے اس وقت عرض کر رہاہوں۔اﷲ والوں کی صحبت میں آنا جانا کبھی ایک رات ان کے پاس رہ جانا۔ یہ تجربہ کی بات کہہ رہا ہوں کہ رات کی رانی کے نیچے ایک شخص سو جائے، رات بھر سوتا رہے، اس کو احسا س بھی نہ ہو کہ میں رات کی رانی کے نیچے سو رہا ہوں لیکن جب صبح اُٹھے گا تو اس کا دماغ تازہ دم ہو گا کہ نہیں؟ کیوں ؟ وہ تو سو رہا تھا۔ اﷲ والوں کی شان کے بارے میں میرا عقیدہ یہ ہے کہ اگربزرگوں کے یہاں کوئی سوتا بھی رہے تو بھی محروم نہیں رہے گا ان شاء اﷲ تعالیٰ، کیوں کہ ان کی سانس میں ذکراﷲ کا نور اور ان کی آہوں کے انوار فضاؤں میں ہوتے ہیں۔ ولی اﷲ کی پہچان حضرت تھانوی رحمۃ اﷲ علیہ نے فرمایا تھا کہ ہمارے تھانہ بھون کا ادنیٰ شاگرد بھی دین کو اتنا سمجھتا ہے کہ دوسری خانقاہوں کے بڑے بڑے پیروں کو بھی دین کی وہ سمجھ نہیں ہے۔ اختیاری غیر اختیاری کچھ جانتے ہی نہیں۔ چند خواب دیکھ لیے لیکن زندگی سنت کے خلاف ہے، اس کو ولی اﷲ سمجھ لیتے ہیں۔ حضرت حکیم الامت نے دین کو صاف کر دیا کہ ولی اﷲ وہ ہے جو سنت پر عمل کرتا ہے،شریعت پر عمل کرتا ہے، خواب نظر آئے نہ آئے، کرامت ہو نہ ہو۔لہٰذا اگر ہم چاہتے ہیں کہ دین پر قائم رہیں اور نفس و شیطان اور معاشرے کے جتنے فتنے ہیں ان سے بچتے رہیں تو اﷲ والوں کے پاس جائیے۔ اب آپ کہیں گے کہ اس کی کیا دلیل ہے؟ دلیلیں تو بہت ہیں مثلاً کُوۡنُوۡا مَعَ الصّٰدِقِیۡنَ کی دلیل ہے۔ اﷲ پاک خود فرما رہے ہیں کہ اﷲسے ڈرو لیکن یہ ڈر تم کو کہاں سے ملے گا؟ ڈرنے والوں کے پاس رہو کُوۡنُوۡا مَعَ الصّٰدِقِیۡنَ یہ تو قرآنِ پاک کی آیت ہے ۔ میں ایک مثال اور عرض کر تا ہوں کہ جب طوفانِ نوح آیا تھا تو نوح علیہ السلام کو حکم ہوا کہ کشتی بناؤ۔ جو لوگ ان کی کشتی میں بیٹھ گئے، وہ طوفان سے بچ گئے، جنہوں نے کشتی کا مذاق اُڑایا کہ جب اتنا طوفان آئے گا تو یہ کشتی کیا کرے گی؟یہ نہیں سوچا کہ کشتی چلانے والا کیسا ہے۔ کشتی کو تو دیکھا کہ لکڑی کی ہے لیکن کشتی چلانے والے کو نہ دیکھا کہ وہ پیغمبر اور نبی ہے۔ لہٰذا جو ظالم کشتی میں نہیں بیٹھے وہ ڈوب گئے اور جو لوگ کشتی میں بیٹھ گئے بچ گئے۔