ماہنامہ انوار مدینہ لاہور اگست 2014 |
اكستان |
|
قسط : ٨ قصص القرآن للاطفال پیارے بچوں کے لیے قرآن کے پیارے قصّے ( الشیخ مصطفٰی وہبہ،مترجم مفتی سیّد عبدالعظیم صاحب ترمذی ) ( حضرت یوسف علیہ السلام کا قصہ ) حضرت اِبراہیم علیہ السلام کے دو بیٹے حضرت اِسماعیل علیہ السلام اور حضرت اِسحاق علیہ السلام تھے،حضرت اِسحاق علیہ السلام کے بیٹے حضرت یعقوب علیہ السلام کو اللہ تعالیٰ نے بارہ بیٹے عطا کیے، حضرت یوسف علیہ السلام بھی آپ کے بیٹے ہیں، بچپن میں حضرت یوسف علیہ السلام نے ایک رات خواب دیکھا کہ گیارہ ستارے، سورج اور چاند اُنہیں سجدہ کر رہے ہیں۔ آپ نے اپنے والد حضرت یعقوب علیہ السلام سے اِس خواب کا تذکرہ کیا، حضرت یعقوب علیہ السلام اپنی بصیرت سے سمجھ گئے کہ عنقریب حضرت یوسف علیہ السلام بلند مرتبہ پر فائز ہوں گے اور اُن کے بھائی اُن کے تابع ہوں گے۔ حضرت یعقوب علیہ السلام نے آپ کو نصیحت فرمائی کہ اپنے اِس خواب کو راز میں رکھیں اور بھائیوں کے سامنے بیان نہ کریں، مبادا بھائی حسد کرنے لگیں اور ایذا رسانی پر اُتر آئیں۔ حضرت یوسف علیہ السلام کے بھائی دیکھتے تھے کہ اُن کے والد ِ محترم حضرت یوسف علیہ السلام اور اُن کے حقیقی بھائی بنیامین سے زیادہ محبت کرتے ہیں اور اُنہیں سب پر ترجیح دیتے ہیں اِس لیے وہ اِن دونوں بھائیوں سے اور بالخصوص حضرت یوسف علیہ السلام سے حسد کرتے تھے۔ آپ کی والدہ حضرت راحیل آپ کے بچپن میں ہی اِنتقال کر گئیں تھیں، ایک دِن سب بھائی جمع ہوئے تو ایک بھائی کہنے لگا : ( اُقْتُلُوْا یُوْسُفَ اَوِاطْرَحُوْہُ اَرْضًا یَّخْلُ لَکُمْ وَجْہُ اَبِیْکُمْ وَتَکُوْنُوْا مِنْ بَعْدِہ قَوْمًا صٰلِحِیْنَ)( سُورہ یوسف : ٩ )