ماہنامہ انوار مدینہ لاہور مئی 2017 |
اكستان |
درس حدیث حضرت اقدس پیر و مرشد مولانا سیّد حامد میاں صاحب کے مجلسِ ذکر کے بعد درسِ حدیث کا سلسلہ وار بیان ''خانقاہِ حامدیہ چشتیہ'' رائیونڈ روڈ لاہور کے زیرِانتظام ماہنامہ '' انوارِ مدینہ'' کے ذریعہ ہر ماہ حضرت اقدس کے مریدین اور عام مسلمانوں تک با قاعدہ پہنچایا جاتا ہے اللہ تعالیٰ حضرتِ اقدس کے اِس فیض کو تا قیا مت جاری و مقبول فرمائے،آمین۔ یہود کی اِنتہا پسندیاں اور عدمِ برداشت اَلْحَمْدُ لِلّٰہِ رَبِّ الْعَالَمِیْنَ وَالصَّلٰوةُ وَالسَّلَامُ عَلٰی خَیْرِ خَلْقِہ سَیِّدِنَا وَمَوْلَانَا مُحَمَّدٍ وَّاٰلِہ وَاَصْحَابِہ اَجْمَعِیْنَ اَمَّابَعْدُ ! حضرت عائشہ رضی اللہ عنہا سے روایت ہے کہ کچھ یہودیوں نے جنابِ رسالت مآب ۖ کی خدمت میں حاضری کی اجازت چاہی (جب وہ داخل ہوئے تو) کہنے لگے اَلسَّامُ عَلَیْکُمْ ۔ '' سَامْ '' موت کوکہتے ہیں۔ تومیں نے کہا کہ تم پر موت ہو اور خدا کی پھٹکار، آقائے نامدار ۖ نے اِرشاد فرمایا اے عائشہ باری تعالیٰ رفق اور نرمی والے ہیں اور ہر کام میں نر می ہی پسند فرماتے ہیں (لہٰذا تم بھی نر می ہی کرو ، درشتی نہ کرو) حضرت عا ئشہ رضی اللہ عنہا نے عرض کیا کہ کیاجناب نے نہیں سنا کہ اِنہوں نے کیا کہا ہے ؟ اِرشاد ہوا کہ میں نے (مختصراً) جواب دے دیا تھا کہ ( وَعَلَیْکُمْ ) اور تم پر ۔ جناب رسالت مآب ۖ جب مکہ معظمہ سے مدینہ منورہ تشریف لائے اُن دنوں یہاں یہودی بکثرت آباد تھے، مدینہ منورہ میں یہودیوں کی خاصی تعداد رہائش پزیر تھی یہودیوں میں بہت سی خراب عا دتیں تھیں اُن عاداتِ رذیلہ میں سے ایک یہ بھی تھی کہ وہ اَحکامِ اِلٰہی کو اپنی منشاء کے مطابق تبدیل کر لیا کرتے تھے، توراة جیسی مقدس کتاب میں تحریف کرنی اُن کا مشغلہ بن چکا تھا، یہ قبیح عادات اُن میں اس لیے پیدا ہوگئی تھیں کہ اُنہوں نے حق تعالیٰ کے پیغمبروں کی توہین کی تھی جس کی پاداش میں خدا تعالیٰ نے اُن کی طبیعتوں کو مسخ کر دیا، اچھی اور بری بات میں تمیز کرنے کا مادّہ اُن سے سلب کر لیا گیا تھا