ماہنامہ انوار مدینہ لاہور مئی 2017 |
اكستان |
 |
علمی مضامین سلسلہ نمبر١٤ قسط : ٥ ''خانقاہِ حامدیہ''نزد جامعہ مدنیہ جدید رائیونڈ روڈ لاہورکی جانب سے محدث ، فقیہ، مؤرخ، مجاہد فی سبیل اللہ،مؤلف کتب کثیرہ شیخ الحدیث حضرت اَقدس مولانا سیّد محمد میاں صاحب رحمة اللہ علیہ کے بعض اہم مضامین جو تاحال طبع نہیں ہوسکے اُنہیں سلسلہ وار شائع کرنے کا اہتمام کیا گیا ہے جبکہ اُن کی نوع بنوع خصوصیات اِس بات کی متقاضی ہیں کہ اِفادۂ عام کی خاطر اُن کو شائع کردیا جائے۔ اِسی سلسلہ میں بعض وہ مضامین بھی شائع کیے جائیں گے جو بعض جرا ئد و اَخبارات میں مختلف مواقع پر شائع ہو چکے ہیں تاکہ ایک ہی لڑی میں تمام مضامین مرتب و یکجا محفوظ ہو جائیں۔ (اِدارہ)حیاتِ مسلم پیدائش سے وفات تک سنن مستحبا ت، بدعات و مکروہات ( شیخ الحدیث حضرت مولانا سیّد محمد میاں صاحب )بیمار، تیمار داری، مزاج پُرسی : مسلمان اگر اللہ کا ہو کر رہے یعنی صرف نام کا مسلمان نہ ہوبلکہ صورت سے بھی مسلمان ہواور سیرت سے بھی، جس کا مطلب یہ ہے کہ پابند ِ شریعت ہواور احکامِ الٰہی کی تعمیل کو زندگی کا نصب العین بنا چکا ہو تو اُس کے لیے جس طرح راحت و آرام اللہ تعالیٰ کا انعام ہے، بیماری اور تکلیف بھی اللہ تعالیٰ کا انعام ہے کیونکہ مسلمان کو کوئی بھی محنت اُٹھانی پڑتی ہے یا طبیعت خراب ہوجاتی ہے یا کسی بات کی فکر ہوتی ہے یا کسی بات پر افسوس ہوتا ہے یا کوئی اذیت پہنچتی ہے یا کوئی اُلجھن اور پریشانی پیش آتی ہے حتی کہ کوئی کاٹنایا پھانس لگ جاتی ہے تو اِن تمام باتوں میں اُس کی غلطیوں کا کفارہ ہوتا ہے۔ ١ ------------------------------ ١ بخاری شریف کتاب المرضٰی رقم الحدیث ٥٦٤١