ماہنامہ انوار مدینہ لاہور مئی 2017 |
اكستان |
|
سلسلہ نمبر٣ قسط : ١ ''خانقاہِ حامدیہ'' کی جانب سے انوارِ مدینہ میں شیخ الاسلام حضرت اقدس مولانا سیّد حسین احمد مد نی قدس سرہ العزیز کے مضامین شائع کرنے کا اہتمام کیا جا رہا ہے حضرتکے متوسلین و خدام سے التماس ہے کہ اگر اُن کے پاس حضرت کے مضامین ہوں تواِدارہ کو اِرسال فرما کر عندالناس مشکور اور عنداللہ ماجور ہوں۔ (اِدارہ)اسلام اور فریضہ تبلیغ ہمدردی نوعِ انسان کا ہمہ گیر جذبہ ( شیخ الاسلام حضرت مولانا سیّد حسین احمد صاحب مدنی ) اَلْحَمْدُ لِلّٰہِ وَکَفٰی وَسَلَام عَلٰی عِبَادِہِ الَّذِیْنَ اصْطَفٰی اَمَّا بَعْدُ !تبلیغ کی ضرورت : دنیا کے تمام عقلاء کااِس پر اتفاق ہے کہ ہر انسان کااخلاقی اور انسانی فرض ہے کہ اگرکسی دوسرے کوکسی سخت نقصان سے دوچار ہوتا ہوا دیکھے تواُس کی مددکرے اور حتی الوسع اُس کی دستگیری کرتا ہوا مصائب وآفات کے پنجہ سے نجات دلوائے اسی بناء پر گڑھے اور کنوؤں میں گرنے والوں، درندوں اور زہریلے جانوروں کے شکار ہونے والوں ،ظالم اور خونخوار حیوانوں کے پنجوں میں پھنسنے والوں، فاقہ اور افلاس وامراض میں مبتلا ہونے والوں وغیرہ وغیرہ کی مدد ہر قوم اور ہرمذہب میں ضروری خیال کی جاتی ہے جبکہ دنیاوی چند روزہ مصائب اور فنا ہونے والے جسم کو تکالیف سے بچانا انسانی فریضہ شمار کیا جاتا ہے تو اُخروی دائمی مصائب اور ہمیشہ باقی رہنے والی روح کو تکالیف سے بچانا کیا اس سے بدرجہا زائد لزوم والا فریضہ شمار نہیں کیا جائے گا اس لیے ہر انسان کا فرض ہے کہ وہ دوسرے انسانوں کی اُخروی زندگی اور رُوحانی امراض سے شفایابی کی طرف پوری توجہ کرے۔