ماہنامہ انوار مدینہ لاہور فروری 2009 |
اكستان |
|
حرف آغاز نحمدہ ونصلی علٰی رسولہ الکریم امابعد ! گزشتہ ماہ کے قومی جرائد میں پاکستان مسلم لیگ (ن) کے صدر اور پنجاب کے وزیر ِ اعلی جنا ب میاں محمد شہباز شریف کی جانب سے عوام کے نام ''اسراف، ضیاع اور نمائش کا خاتمہ'' کے عنوان سے ایک کھلا خط شائع ہوا ہے جس میں عوام سے شادی بیاہ کے موقع پر حد سے زیادہ اِسراف اور نمود ونمائش کو ترک کرکے سادگی اختیار کرنے کی نہایت درد بھرے اَنداز میں ترغیب دی گئی ہے۔ وزیر اعلیٰ پنجاب کی جانب سے عوام کو سادگی کی ترغیب دینا ایک مستحسن اقدام ہے جس کو ہر سنجیدہ شخص قد رکی نظر سے دیکھتا ہے اور توقع کرتا ہے کہ اِس کے ذریعے بہتر سوچ عوام میں پیدا ہو مگر قومی سطح پر خودغرضی مطلب پرستی اور بے حسی کا سرطان جس حد تک مزاجوں میں بگاڑ پیدا کرچکا ہے اُس کا علاج صرف ترغیبوں سے ممکن نہیں ہے بلکہ اُس کے لیے دوا اَور بعض حالات میں سرجری کی بھی ضرورت پیش آجا تی ہے۔ لہٰذا ضرورت اِس بات کی ہے کہ ترغیبوں کے ساتھ سخت قوانین بھی بنائے جائیں اور اُن کو پوری قوت سے نافذ بھی کیا جائے تاکہ معاشرہ کو دیمک کی طرح چاٹ جانے والے بد مست عناصر کا قلعہ قمع کیا جاسکے ۔