ماہنامہ انوار مدینہ لاہور مئی 2007 |
اكستان |
 |
روایت موجود ہے کہ جناب رسول اللہ ۖ نے ابتدائے شب میں بھی اور وسط شب میں بھی اور آخر شب میں بھی تہجد پڑھی ہے ،مگر آخری ایام میں زیادہ تر اَخیر شب میں پڑھنا ہوا ہے۔ جس قدر بھی رات کا حصہ متأخر ہوتا جاتا ہے برکات اور رحمتیں زیادہ ہوتی جاتی ہیں اور سُدس آخر میں سب حصوں سے زیادہ برکات ہوتی ہیں۔ تہجد ترکِ ہجود یعنی ترک ِنوم سے عبارت ہے اِس لیے اَوقاتِ نوم بعد عشاء سب کے سب وقت ِتہجد ہی ہیں۔ ٭ ملائکہ جن کو بالذات طہارت اور روشنی سے محبت ہے اور نجاست و ظلمات سے نفرت ہے وہ اِس (طہارت) کی وجہ سے نمازی کے ساتھ تعلقات پیدا کرتے ہیں اور اللہ تعالیٰ کے ساتھ محبوبیت حاصل ہوتی ہے۔ ٭ اَلفاظِ قرآنیہ اور اَسمائے باری عزوجل اور اَدعیۂ ماثورہ اور دُرودشریف کی تاثیریں سمجھنے پر موقوف نہیں ہیں۔ گل بنفشہ جان کر پیجئے یا بغیر جانے ہوئے اسہال بلغمی کا حاصل ہونا ضروری ہے۔ الفاظِ قرآنیہ اور اَسمائے باری عزوجل حامل تاثیرات ہیں جوکہ بے سمجھے ہوئے بھی حاصل ہوتی ہیں اگرچہ بہ نسبت سمجھنے کے کمزور ہوں۔ ٭ اَرکانِ اسلام اور اُس کے سنن و آداب کو دیکھیے۔ ضَعِیْفُ الْبُنْیَانْ ، مخلوق مِنَ الْمَآئِ الْمَہِیْنِ بشر کے لیے وہ اعلیٰ مکان اور اَرفع مرتبہ دکھائی دیتا ہے کہ جس کو اگر کروبی بنظر غبطہ دیکھیں یا مولی العالمین محفل ملائکہ میں مباہات فرمائے اور اَلَّذِیْنَ یَحْمِلُوْنَ الْعَرْشَ وَمَنْ حَوْلَہ اس کے لیے دعواتِ صالحہ سے رطب اللسان ہوں تو کچھ تعجب نہیں ہے۔ افسوس ہے ہم اپنی نمازوں سے سخت غافل ہیں۔ ٭ مؤمن محمدی نماز میں اُن اُناس ِمادیہ سے اُٹھایا جاتا ہے۔ تدلی اور قرب کی نعمت عطا کی جاتی ہے فَاِنَّ اللّٰہَ بَیْنَہ وَبَیْنَ الْقِبْلَةِ شاہد ِعدل ہے۔ حضرت شاہ ولی اللہ صاحب رحمة اللہ علیہ فرماتے ہیں کہ ہر نمازی کے سامنے جبکہ وہ نماز کی نیت کرتا ہے تجلی ٔخداوندی اور حقیقت از حقائق ِالٰہیہ ظہور پذیر ہوتی ہے، خواہ وہ اُس کا احساس کرے یا نہ۔ اور اِسی تجلی کو راز فَاِنَّ اللّٰہَ بَیْنَہ وَبَیْنَ الْقِبْلَةِ قرار دیتے ہیں اور اِس تجلی کی نسبت ذات ِمجمع الکمالات سے نسبت ساق الی الذوات قرار دیتے ہوئے یَوْمَ یُکْشَفُ عَنْ سَاقٍ (الآیة) کی توجیہ فرماتے ہیں۔ حضرت شاہ عبد العزیز رحمة اللہ علیہ بھی سورۂ قیامہ میںاِسی طرف اِشارہ فرماتے ہیں۔نمازوں میں رہنے کی وجہ سے اِس تجلی ٔخداوندی سے مؤمن محمدی کو طبعی مناسبت پیدا ہوجاتی ہے جوکہ میدانِ قیامت میں ذریعہ معرفت ِخداوندی ہوجائے گی اور مؤمن سجدہ میں گرجائے گا۔