ماہنامہ انوار مدینہ لاہور فروری 2007 |
اكستان |
 |
امریکہ کے پاس دس ہزار ایٹم بم موجود ہیں : رپورٹ واشنگٹن (اے این این) مڈل ایسٹ اسٹڈی سنٹر کی رپورٹ کے مطابق امریکہ کے پاس اِس وقت 10 ہزار ایٹم بم موجود ہیں جو امریکہ کی 12ریاستوں میں 28مقامات پر رکھے گئے ہیں۔ اِن کے علاوہ چھ یورپی ممالک بیلجٔیم، جرمنی، اٹلی، ہالینڈ، ترکی اور برطانیہ میں بھی امریکی ایٹم بم موجود ہیں۔ (روز نامہ نوائے وقت ١٩ نومبر ٢٠٠٦ء ) ''قرآن میں 40سپارے نہیں میں بھول گیا 30ہوتے ہیں '' ٹی وی پروگرام میں وفاقی وزیر تعلیم جاوید اشرف قاضی کا بیان لاہور (کلچرل رپورٹر) وفاقی وزیر تعلیم جاوید اشرف قاضی نے گزشتہ روز قرار دے دیا کہ ''قرآن مجید کے چالیس سپارے ہیں''۔ تاہم بعد میں اُنہوں نے اپنے بیان کی تصحیح کرلی۔ گزشتہ صبح ساڑھے 9بجے ٹی وی چینل اے آر وائی ون پر ڈاکٹر واحدی کے پروگرام ''باخبر سویرا'' میں اِس سوال پر کہ کیا آپ اسلامیات کا سلیبس بدل رہے ہیں۔ جاوید اشرف قاضی نے کہا سائنس کی کتابوں میں بھی قرآنی آیات ہیں۔ اب ہم اسلامیات کے مضمون میں قرآن مجید کے پورے چالیس سپارے پڑھائیں گے۔ بعد اَزاں ڈاکٹر واحدی نے چالیس سپاروں کی بات دُہرائی جس پر جاوید اشرف قاضی نے کہا کہ میں بھول گیا تھا کہ قرآن پاک میں تیس سپارے ہوتے ہیں۔(روز نامہ نوائے وقت ١٤ دسمبر ٢٠٠٦ء ) امریکہ ایران ہی نہیں سعودی عرب کو بھی نشانہ بنانا چاہتا ہے : جرمن اخبار لاہور (نیٹ نیوز) جرمن زبان کے ایک ویکلی میگزین ''سپیرو'' نے ایک خطرناک انکشاف کیا ہے۔ سپیرو نے لکھا ہے کہ امریکہ صرف ایران ہی کو نہیں سعودی عرب کو بھی نشانہ بنانا چاہتا ہے کیونکہ وہ بھی پاکستان کی مدد سے نہایت خفیہ طور پر ایٹمی ہتھیار بنارہا ہے۔ سپیرو کے مطابق سعودی نیوکلیئر سائنسدان 1990 سے پاکستان کے ایک نیوکلیئر ری ایکٹر میں کام کررہے ہیں۔(روز نامہ نوائے وقت ٢٦ جنوری ٢٠٠٧ ء )