ج : اسپر واجب ہے کہ طواف کا اعادہ کرے اور اگر عمداً ایسا کیا ہے تو تو بہ واستغفار بھی کرے ، اور اگر اعادہ نہیں کیا تو ایک دم دینا لازم ہے ۔
س : ایک شخص نے با وضو طوافِ زیارت شروع کیا تین چکر کرنے کے بعد اسکا وضو ٹوٹ گیا تو اسنے چار چکر بلا وضو کرکے طواف پورا کرلیا تو اب اسکا کیا حکم ہے ؟
ج : اس کو وضو کرکے چار چکروں کا اعادہ کرنا چاہیئے ،استغار وتوبہ بھی کرنی چاہیئے ، اور اگر اعادہ نہیں کیا تو دم دینا لازم ہے ، اور اعادہ کرنے سے دم ساقط ہوجائیگا ۔ (غنیۃ ۲۷۲)
س : اگراسنے طواف کے بقیہ چکروں کا اعادہ بارہ ذی الحجہ کے بعد کیا ہے تو کیا دم ِ تاخیر دینا ہوگا ؟
ج : اس صورت میں دم تاخیر دینا لازم نہیں ۔ (مناسک ملا علی القاری ص ۳۴۶)
س : اگر طوافِ زیارت کے تین چکر بلا وضو کئے ہوں اسکے بارے میں ارشاد فرمائیں ۔
ج : اسکو طوافِ زیارت کے ان تین چکروں کا باوضو اعادہ کرنا چاہئے اعادہ کرنے سے جزاء ساقط ہوجائیگی ، اور اگر اعادہ نہیں کیا تو ہر چکر کے بدلے صدقۂ فطر کے برابر صدقہ دینا واجب ہوگا ، اور استغفاروتوبہ بھی۔