بنی اسرائیل کے تین آدمیوں کا واقعہ: بنی اسرائیل میں تین آدمی کہیں جارہے تھے۔ راستے میں بارش شروع ہوگئی، تینوں بارش سے بچنے کے لیے کسی غار (پہاڑ کی کھوہ) میں داخل ہوگئے۔ اتفاق سے اس غار پر اوپر سے پتھر کی چٹان آکر گر پڑی، جس سے غار کا منہ بالکل بند ہوگیا اور اب نکلنے کی کوئی راہ نہ تھی اور یقین ہوگیا کہ اب ہلاکت یقینی ہے۔ ان تینوں نے آپس میںیہ طے کیا کہ ہر آدمی اپنے کسی عمل مقبول کاواسطہ دے کر دعا کرے، شاید اس کے طفیل نجات مل جائے۔ چناںچہ ان میں ایک شخص (جس کا یہاں ذکر مقصود ہے) نے یہ دعا کی کہ اے اللہ! تو جانتا ہے کہ میں روزانہ بکریاں چراتا ہوں، شام کو واپس آکر پہلے اپنے ماں باپ کو دودھ نکال کر پلاتا ہوں اور پھر اپنے بچوں کو۔ ایک مرتبہ شام کو آتے آتے دیر ہوگئی، گھر جب پہنچا تو والدین سوچکے تھے۔ دودھ نکالا تو میرے بچے مانگنے لگے، لیکن میں نے کہا جب تک ماں باپ نہ پی لیں نہیں پلاؤں گا۔ ان کو بیدار کرنا مناسب نہیں سمجھا۔ دودھ کا پیالہ لے کر سرہانے کھڑا ہوگیا کہ جب بیدار ہوں گے تو پلاؤں گا اور بچے بلبلاتے رہے، یہاں تک کہ صبح ہوگئی۔ جب اٹھے تو ان کو پلایا پھر بچوں کو۔ اے اللہ! اس عمل کے طفیل دعا کرتا ہوں کہ راستہ دے دے۔ چناںچہ وہ پتھر کچھ ہٹ گیا جس سے کچھ ہوا آنے لگی اور روشنی ہوگئی، لیکن نکل نہیں سکتے تھے۔ اسی طرح دوسرے اور تیسرے نے اپنے اپنے نیک عمل کا واسطہ دیا اور غار سے وہ پتھر ہٹ گیا اور راستہ مل گیا۔
حضرت موسیٰ ؑ کا رفیقِ جنت: حضرت موسیٰ ؑ نے دعا کی کہ اے اللہ! جنت میں
جو میرا رفیق ہوگا وہ بتادے۔ اللہ جل جلالہ نے بتایا کہ فلاں جگہ اس صفت کا آدمی ہے، اسے دیکھ لو۔ چناںچہ تلاش کرتے کرتے پہنچے تو دیکھا ایک آدمی ہے اور اس کی ماں بالکل بوڑھی، اپاہج، چلنے پھرنے اور حرکت کرنے سے معذور ہے، یہ آدمی محنت و مزدوری کرتا ہے اور روزانہ دونوں وقت آکر اپنی ماں کو اپنے ہاتھ سے لقمہ دیتا ہے اور اس کی خدمت کرتا ہے۔ ماں اس کی خدمت کے صلے میں دعا دیتی ہے کہ بیٹا! اللہ تجھے جنت میں موسیٰ کا رفیق اور ساتھی بنائے۔
ماں ناراض ہو تو مرتے وقت کلمہ زبان پر جاری نہیں ہوتا: رسول اللہﷺ کے زمانے میں ایک جوان شخص کا انتقال ہونے لگا۔نبی پاکﷺ تشریف لائے اور کلمہ کی تلقین کرنے لگے، لیکن اس کی زبان پر کلمہ جاری نہیں ہوتا۔ آپ سمجھ گئے کہ ماں ناراض ہے۔ پھر ماں کو بلایا اور اس سے کہا کہ کیا تو چاہتی ہے کہ تیرا بیٹا جہنم کی آگ میں جلے؟ اس نے کہا: نہیں۔ تب فرمایا کہ بیٹے سے جو غلطی ہوئی ہو اس کو معاف کردے اس سے راضی ہوجا۔ چناںچہ اس نے معاف کردیا اور بچے کی
