ماہنامہ انوار مدینہ لاہور ستمبر 2014 |
اكستان |
|
سیرت خُلفا ئے راشد ین ( حضرت مولانا عبدالشکور صاحب فاروقی لکھنوئی ) اَمیر المؤمنین حضرت عثمان بن عفّان ذوالنّورین حضرت عثمان کے بعض حالات و کرامات و چند کلمات : (١) حضرت حماد بن زید کہتے ہیں کہ چالیس دِن سے زائد حضرت عثمان رضی اللہ عنہ کا محاصرہ قائم رہا مگر اِتنی طویل مدت میں کوئی لفظ اُن کی زبان سے ایسا نہ نکلا جس میں کسی بدعتی کو کوئی سہارا ملتا۔ (٢) حضرت عبداللہ بن شداد کہتے ہیں میں نے حضرت عثمان رضی اللہ عنہ کو اُن کے زمانۂ خلافت میں جمعہ کے دِن منبر پر خطبہ پڑھتے ہوئے دیکھا اُس وقت جو لباس وہ پہنے ہوئے تھے اُس کی قیمت چار پانچ درہم سے زائد نہ تھی۔ (٣) حضرت حسن ِ بصری کہتے ہیں کہ میں نے زمانہ ٔ خلافت میں حضرت عثمان رضی اللہ عنہ کو دیکھا کہ مسجد میں لیٹے ہوئے تھے اور سنگریزوں کے نشانات اُن کے پہلو میں بن گئے تھے، لوگ کہتے ہیں کہ یہ اَمیر المومنین ہیں اور اِس حالت میں رہتے ہیں۔ (٤) ایک روز ایک شخص حضرت عثمان رضی اللہ عنہ کے پاس گیا، راستے میں کسی اَجنبی عورت پر اُس کی نگاہ پڑ گئی تھی۔ آپ نے فرمایا بعض لوگ میرے پاس اِس حالت میں آتے ہیں کہ اُن کی آنکھوں میں زِنا کا اَثر ہوتا ہے ،ایک شخص نے کہا کہ کیا بعد رسول اللہ ۖ کے وحی نازل ہوئی ؟ آپ نے فرمایا نہیں بلکہ فراست ِاِیمانی سے یہ باتیں معلوم ہوجاتی ہیں۔ (٥) حضرت نافع کہتے ہیں کہ جہجاہ غفاری نے حضرت عثمان رضی اللہ عنہ کو ایک لکڑی ماردی تھی تو اُس کے پاؤں میں گوشت خورہ ١ نکل آیا تھا۔ ١ گوشت خورہ ایک بیماری ہوتی ہے جو کبھی اچھی نہیں ہوتی۔