شب قدر کی سب سے بڑی فضیلت
پہلی اور سب سے بڑی فضیلت شب قدر کی یہ ہے کہ اس میں اللہ تعالیٰ نے اپنا قرآن اتارا، نزول قرآن کا عظیم واقعہ اس شب میں ہوا۔ آگے دوسری بڑی فضیلت بتاکر اللہ تعالیٰ اس کی عظمت ظاہر فرمارہے ہیں۔
لَیْلَۃُ الْقَدْرِ خَیْرٌ مِنْ اَلْفِ شَہْرٍ
شب قدر ہزار مہینوں سے بہتر ہے۔
ایک رات کی عبادت ہزار مہینوں سے بہتر… اور ہزار مہینوں کے تیراسی سال چارماہ بنتے ہیں، ایک رات کی عبادت کا اتنا بڑا ثواب!
پھر عجیب بات یہ کہ ہزار مہینوں کے برابر نہیں کہا بلکہ… خَیْرٌ مِنْ اَلْفِ شَہْرٍ ہزار مہینوں سے بہتر… کتنا بہتر؟اس کی کوئی حد نہیں بتلائی۔
دگنی، چوگنی، دس گنی، سوگنی… سارے ہی احتمالات ہوسکتے ہیں۔
اس امت کے لئے تیز پرواز کی صورتیں
درحقیقت اللہ تعالیٰ اس امت کو تیز پرواز کی راہیں عطا فرماتا ہے۔
سفر کی سواریاں مختلف قسم کی ہوتی ہیں، ایک سفر بیل گاڑی سے ہوتا ہے، گدھے اور خچر سے ہوتا ہے، یہ بہت دھیمی رفتار کا سفر ہے۔
اس سے تیز سفر گھوڑے کی سواری سے ہوتا ہے، اس سے تیز بس ،کار اور ٹرین کا ہوتا ہے۔اس سے تیز اور تیزتر سفر ہوائی جہاز کا ہوتا ہے جو مہینوں کا اور دنوں کا سفر گھنٹوں میں طے کرلیتا ہے۔