تذکرہ حضرت ابوبکر صدیق رضی اللہ تعالیٰ عنہ
حضرت ابوبکر صدیق رضی اللہ عنہ مَردوں میں سب سے پہلے مسلمان ہیں۔ خود فرماتے ہیں کہ اَنَا اَوَّلُ الْاِسْلَامِ میرا اسلام اوّل ہے یعنی میں سب سے پہلا مسلمان ہوں۔ ان کے والد کا نام ابوقحافہ ہے۔اور صدیقِ اکبر رضی اللہ تعالیٰ عنہ کی چند خصوصیات ہیں جو اُمت کے کسی دوسرے صحابی کو حاصل نہیں۔ پہلی خصوصیت یہ کہ اُمت میں سب سے پہلے جنت میں جائیں گے۔ دوسری خصوصیت یہ ہے کہ سب سے پہلے اسلام لانے والے ہیں۔ تیسری یہ کہ ان کی چار پشت صحابی ہے، کسی دوسرے صحابی کو یہ مقام حاصل نہیں ہے۔شیخ ولی الدین، صاحبِ مشکوٰۃ اسماء الرجال میں فرماتے ہیں کہ کسی صحابی کو یہ نعمت حاصل نہیں کہ اس کی چار پشت صحابی ہو۔ سبحان اللہ! یہ اللہ کی عطا ہے۔ چوتھی خصوصیت ہے:
لَمْ یُفَارِقْہُ فِی الْجَاھِلِیَّۃِ وَلَا فِی الْاِسْلَامِ
یعنی بعضے لوگ تو اسلام لانے کے بعد حضور صلی اللہ علیہ وسلم پر عاشق ہوئے، لیکن یہ اسلام لانے سے پہلے بھی حضور صلی اللہ علیہ وسلم کے دوست تھے۔ یہ الاکمال فی اسماء الرجال کی عبارت نقل کررہا ہوں۔حضرت ابوبکر صدیق رضی اللہ عنہ کے اسلام لانے کے انتظامات پہلے ہی آسمانوں میں ہوچکے تھے۔ روایت میں ہے کہ شام میں انہوں نے ایک خواب دیکھا تھا جس کو انہوں نے ایک نصرانی پادری سے بیان کیا کہ میں نے یہ خواب دیکھا ہے، اس کی تعبیر بتاؤ۔ اس وقت نبی کریم صلی اللہ علیہ وسلم نے نبوت کا اعلان نہیں فرمایا تھا۔ نصرانی پادری نے خواب سن کر کہا کہ اس کی تعبیر یہ ہے کہ آپ کے مکہ شریف میں ایک نبی پیدا ہوں گے۔
وَاَنْتَ تَکُوْنُ وَزِیْرَہٗ فِیْ حَیَاتِہٖ وَخَلِیْفَتَہٗ بَعْدَ وَفَاتِہٖ
ان کی حیات میں آپ ان کے وزیر ہوں گے اور ان کی وفات کے بعد ان کے خلیفہ ہوں گے۔ جب حضور صلی اللہ علیہ وسلم نے اعلانِ نبوت فرمایا تو حضرت ابوبکر صدیق رضی اللہ عنہ نے جاکر عرض کیا کہ مَا الدَّلِیْلُ عَلٰی مَا تَدَّعِیْ ؟آپ جس چیز کا دعویٰ فرماتے ہیں یعنی نبوت کا تو آپ کے پاس اپنے اس دعویٰ کی کیا دلیل ہے؟
