پیش لفظ
عارف باللہ حضرت اقدس مولانا شاہ حکیم محمد اختر صاحب رحمۃ اللہ علیہ نے مسلمانوں کے تین طبقات کی نشاندہی فرمائی ہے۔ایک طبقہ وہ ہے جس نے محض کتابیں پڑھ کر دین کی تعلیم حاصل کی لیکن کسی اللہ والے کے پاس جاکر اپنے اخلاق کی اصلاح اور نفس کا تزکیہ نہیں کروایا وہ اپنے حاصل کردہ علم کو بھی بھول گیا۔ دوسرا طبقہ وہ ہے جس نے صرف اللہ والوں کی صحبت کا فیض اٹھایا، اس کی برکت سے اسے دین کا ضروری علم بھی حاصل ہوا، اخلاق کی اصلاح بھی ہوئی، گناہوں سے پاک تقویٰ والی حیات بھی نصیب ہوئی اور ذکر وعبادات کا نور بھی حاصل ہوا، گویا سراپا نور ہوگئے۔تیسرا طبقہ وہ ہے جس نے دین کا علم بھی حاصل کیا، عالم بھی ہوئے اور اہل اللہ کی صحبتوں کا فیض بھی اٹھایا، اپنے علم کے نور اور ذکر وعبادات کے نور سےوہ نورٌ علی نور ہوگئے۔
اپنے اس وعظ میں عارف باللہ حضرت اقدس مولانا شاہ حکیم محمد اختر صاحب رحمۃ اللہ علیہ نےاہل اللہ کی صحبتوں کو مختلف واقعات، حکایات اور قرآن و حدیث کی روشنی میں جس طرح اجاگر فرمایا ہے وہ حضرت والا ہی کاخاص اندازِ بیاں ہے۔اللہ تعالیٰ اس وعظ کو قبول فرمائیں، امت کے لیے نافع بنائیں اور حضرت والا رحمۃ اللہ علیہ کے لیے صدقۂ جاریہ بنائیں، آمین۔
یکےاز خدام
عارف باللہ حضرت مولانا شاہ حکیم محمد اختر صاحب رحمۃ اللہ علیہ
و
حضرت مولانا شاہ حکیم محمد مظہر صاحب دامت برکاتہم
