محبت الہیہ کی عظمت |
ہم نوٹ : |
|
شاہی حکم زیادہ قیمتی ہے یا موتی؟ اس لیے ان ملکوں میں یہی ایک کام کرلو تو سب کے سب سو فیصد ولی اﷲ ہوجاؤگے،کیوں کہ نظر بچانے پر اﷲ تعالیٰ کا وعدہ ہے کہ اگر تم اپنی آنکھ کی مٹھاس ہم کو دے دو اور حرام مٹھاس سے اپنے کو بچالو اور میری وفاداری کا ثبوت پیش کردو، تو میرے دوست ہوجاؤ گے اور جس کا میں دوست ہوجاؤں تو دونوں جہاں اس کے ہیں ؎ جو تو میرا تو سب میرا فلک میرا زمیں میری اگر اک تو نہیں میرا تو کوئی شے نہیں میری اﷲ تعالیٰ کے باوفا بندے کون ہیں؟ آہ! اہلِ وفا بندے وہی ہیں جو اﷲ تعالیٰ کے قانون کو نہیں توڑتے اور اﷲ پر جان فدا کرتے ہیں۔ اور میں قسم کھاکر کہتا ہوں کہ اﷲ نے گناہ سے بچنے کی ہم کو طاقت دی ہے۔ بولیے! جوشخص یہ کہتا ہے کہ مجھے حسینوں سے نظر بچانے کی طاقت نہیں ہے، لیکن حسین لڑکی کا اور لڑکے کا باپ ایس پی ہو اور وہ پستول لگا کر کہتا ہو کہ میرے بیٹے بیٹی کو دیکھو بڑےحسین ہیں مگر جو ان کو دیکھے گا میں گولی ماردوں گا۔ بتاؤ پھر کوئی دیکھے گا؟ گولی تو دور کی بات ہے، کوئی ذرا تگڑا مسٹنڈا باکسر ماسٹر ہو اور یہ نظر باز جانتا ہو کہ میں سیر ہوں تو یہ سوا سیر ہے، ایک گھونسہ مارے گا تو کلّہ پھٹ جائے گا، تو بتاؤ مخلوق کی مار کے خوف سے دیکھے گا وہ آدمی؟ بولو بھئی! مخلوق کی مار سے ڈر گئے اور اﷲ کے پیار سے محروم ہونے سے نہیں ڈرتے؟ اپنی جان پیاری سہی، مگر وہ اﷲ تمہاری جان سے پیارا ہے یا نہیں؟ ہماری آرزو اور ہماری جان اﷲ کے سامنے کیا اہمیت رکھتی ہے۔ لہٰذا بڑے پیارے پرکم پیاری چیز فدا کردو، بس اﷲ پر جان فدا کردو ؎ جان دی دی ہوئی اُسی کی تھی حق تو یہ ہے کہ حق ادا نہ ہوا اﷲ سے بڑھ کر کوئی محبت کرنے والا نہیں جو لوگ یہ بہانا کرتے ہیں کہ ہم پرانے پاپی ہیں، اس لیے ہم سے گناہ نہیں چھوٹتےیہ کہنے سے وہ قیامت کے دن بچ نہیں جائیں گے، وہ اپنے اس بہانے سے توبہ کریں۔