تعلیم و تزکیہ کی اہمیت |
ہم نوٹ : |
 |
خواجہ حسن بصری رحمۃاللہ علیہ کی سنت تحنیک ادا کرتے وقت دُعا فرمائی: اَللّٰھُمَّ فَقِّھْھُ فِی الدِّیْنِ وَحَبِّبْہُ اِلَی النَّاسِ 19؎اے اللہ! حسن بصری کو دین کی سمجھ عطا فرما اور لوگوں میں محبوب کردے۔امیرالمؤمنین سیدنا عمر رضی اللہ تعالیٰ عنہ کی دُعا کتنی جامع ہے اور دُعا کے دونوں جملوں میں ایک خاص ربط ہے جو اللہ تعالیٰ نے میرے دل کو عطا فرمایا۔ دین کی سمجھ کےساتھ لو گوں میں محبوبیت کیوں مانگی؟ اس لیے کہ اگر کسی میں دین کی سمجھ تو ہو، لیکن لوگوں میں محبوب نہ ہو تو لوگ اس سے دین نہیں سیکھیں گے اور اگر لوگوں میں محبوب ہو، لیکن فقیہ نہ ہو تو بدعت و گمراہی پھیلائے گا۔ محدثین لکھتے ہیں کہ حضرت عمر رضی اللہ تعالیٰ عنہ کے لعابِ دہن کی کرامت ہے کہ خواجہ حسن بصری رحمۃاللہ علیہ اتنے بڑے عالم ہوئے کہ حضرت انس رضی اللہ تعالیٰ عنہ جیسے صحابی اپنے شاگرد خواجہ حسن بصری رحمۃاللہ علیہ کو جب بلاتے تھے تو فرماتے تھے یَامَوْلَانَا الْحَسَنْ !کبھی حسن نہیں کہا۔ چوتھی تفسیر مَا تُکْمَلُ بِہِ النُّفُوْسُ مِنَ الْاَحْکَامِ وَالْمَعَارِفِ جس سے اللہ کے رسول صلی اللہ علیہ وسلم نفوسِ صحابہ کی تکمیل فرماتے تھے۔ پانچویں تفسیر وَضْعُ الشَّیْءِ فِیْ مَحَلِّہٖ 20؎ ہر شیٔ کو اس کے محل میں رکھنا۔یہ سکھایا سرورِ عالم صلی اللہ علیہ وسلم نے۔ یہ تفسیر ہے حکمت کی، نوٹ کرلیجیے گا۔ یہ پکی پکائی کھچڑی کھالو، اس میں آسانی بھی ہے اور یہ طریقِ نبوت ہے۔ نبی کی زبان سے اور صحابہ کے کانوں سے علم چلتا ہے، لہٰذا سننے سے جو تقریر ذہن میں آتی ہے خود کتاب دیکھنے سے وہ بات نہیں پیدا ہوتی۔ بتارہا ہوں، یہ طریقِ صحابہ ہے۔ بتائیے! صحابہ نے کتاب پڑھی تھی یا زبانِ نبوت سے علم حاصل کیا تھا؟ بس سمجھ لو حضرت آدم علیہ السلام سے لے کر علم ایسے ہی چلا ہے۔ _____________________________________________ 19؎تھذیب الکمال:104/6، باب الحاء من اسمہ الحسن،مؤسسۃ الرسالۃ 20؎روح المعانی:387/1،البقرۃ(129)،داراحیاء التراث، بیروت