دیکھ بھی رہا ہے اور لَاحَوْلَ وَلَا قُوَّۃَ بھی پڑھ رہا ہے، یہ لاحول فائدہ نہیں کرتا۔ پہلے نظر ہٹاؤ پھر لاحول پڑھو، یہ لاحول تو تمہارے اوپر خود لاحول پڑھ رہا ہے اور مولانا کو بھی شامل کرنا چاہ رہا ہے۔ بہت چالاک لوگ ہوتے ہیں۔ اے مولویو! ہوشیار رہنا! جب کوئی کہے کہ مولانا دیکھو کیا بے حیائی کا زمانہ آگیا تو سمجھ لو یہ تمہیں اپنی حرام لذت میں ’’اِن‘‘ (In) کررہا ہے۔
اللہ کے باوفا بندے اللہ کے راستے میں اور کیا مجاہدہ کرتے ہیں؟
۲) اَلَّذِیْنَ یَخْتَارُوْنَ الْمَشَقَّۃَ فِیْ نُصْرَۃِ دِیْنِنَا جو دین پھیلانے کے لیے اپنی جان اور مال، اپنا علم اور وقت قربان کرتے ہیں۔
۳) اَلَّذِیْنَ یَخْتَارُوْنَ الْمَشَقَّۃَ فِی امْتِثَالِ اَوَامِرِنَا جو میرا حکم بجالاتے ہیں اور حکم کے بجالانے میں جو بھی تکلیف ہو برداشت کرتے ہیں۔ چاہے رمضان کے روزے ہوں، چاہے زکوٰۃ دینا ہو، چاہے حج کرنا ہو، چاہے جہاد کرنا ہو اور چاہے نماز پڑھنا ہو اور
۴) اَلَّذِیْنَ یَخْتَارُوْنَ الْمَشَقَّۃَ فِی الْاِنْتِہَاءِعَنْ مَّنَاہِیْنَا جو گناہ سے بچنے میں ہر تکلیف کو برداشت کرتے ہیں۔11؎ غرض میرے عاشقوں کی ہر ادا میری محبت کی غماز ہے۔
اسلام کا محور محبت ہے
میرے شیخ شاہ عبدالغنی صاحب رحمۃ اللہ علیہ فرماتے تھے پورا اسلام محبت ہے۔ بتاؤ! محبوب سے بات کرنے کو دل چاہتا ہے یا نہیں؟ یہی نماز ہے۔ اِیَّاکَ نَعۡبُدُ اے اللہ! ہم آپ کے غلام ہیں اور وَ اِیَّاکَ نَسۡتَعِیۡنْ مگر ہماری عبادت اور غلامی آپ کی محتاجِ استعانت ہے، آپ ہی کی مدد کا سہارا ہے۔ بتائیے! گفتگو ہورہی ہے یا نہیں؟ تو نماز اللہ تعالیٰ سے بات چیت کا راستہ ہے، ملاقات کا ذریعہ ہے۔اور جس سے محبت ہوتی ہے اس کو دیکھ کر کھانا پینا بھی یاد نہیں رہتا۔ کہتے ہیں کہ آپ کو دیکھ کر اتنا مزہ آیا کہ میری بھوک پیاس ہی ختم ہوگئی، میں تو کھانا پینا سب بھول گیا۔ رمضان شریف میں اللہ سے یہ محبت تم بھی کرلو۔ دن بھر پیٹ جلالو لیکن پہلے اچھی طرح سے سحری کھالو، پھر شام تک میری محبت میں بھوکے پیاسے رہنے کا مزہ لوٹو۔
_____________________________________________
11؎ التفسیر المظہری: 95/8،بلوجستان بک دبو