Deobandi Books

شیطان انسان کا ازلی دشمن ہے، وہ اس رات میں امت کو کہاں کہاں مشغول کردیتا ہے، خدا کی رحمتوں سے دور کردیتا ہے، خدا کی لعنت اور غضب کا مستحق بنا دیتا ہے۔
یہ کتنی بڑی ناقدری ہے، ناسپاسی ہے کہ اللہ کی رحمت شروع رات سے ہی ہماری طرف متوجہ ہو، وہ لپک کہ ہمیں اپنی آغوش میں لینے کے درپے ہو …… اور ہم غفلت میں اورمیٹھی نیند میں بڑے ہوں، …… اور اس سے بڑا غضب کہ ہم لہو ولعب میں اور آتش بازی میں پڑے ہیں۔
آتش بازی کرنے والے اپنے عمل سے یہ ثبوت دے رہے ہیں …کہ آسمانوں سے تو خدا کی رحمت زمین پر آتی ہے تاکہ ان کے گناہ معاف کرکے انہیں اپنا محبوب بنالیں …… مگر بندے ہیں کہ آگ کے شعلے آسمانوں کی طرف چھوڑ رہے ہیں تاکہ رحمت خداوندی متوجہ نہ ہوسکے، اور لوگوں پر گناہوں کا بوجھ جوں کا توں باقی رہے …… استغفر اللہ، استغفراللہ
شب برأت میں حضور صلی اللہ علیہ وسلم کا عمل
اس رات میں آپ صلی اللہ علیہ وسلم نے امت کو عبادت پر متوجہ کیا، اور خود بھی عبادت کرکے دکھلایا۔
بیہقی کی روایت میں ہے، ماں عائشہؓ فرماتی ہیں کہ ایک دفعہ پندرھویں شعبان کو حضورؐ میرے پاس تشریف لائے، اس وقت میری ہی باری تھی، آپؐ نے کپڑے اتارے اورابھی پورے کپڑے اتارے بھی نہ تھے کہ پھر پہن لئے۔