عورت کا فتنہ اور اُس سے بچنے کے اسباب |
ِس کتاب |
|
(1) عورت کے جسم کا فتنہ : عورت کا پہلااورسب سےمُہلک اورخطرناک فتنہ یہ ہے کہ قدرتی طور پر اُس کے جسم کی بناوٹ اورساخت کو پُرکشش اور خوبصورت بنایا گیا ہے اور پھر مَردوں کی طبیعتوں کو فطرتاً اُن کی جانب مائل کیا گیا ہے ،چنانچہ اللہ تعالیٰ کا اِرشاد ہے:﴿زُيِّنَ لِلنَّاسِ حُبُّ الشَّهَوَاتِ مِنَ النِّسَاءِ﴾لوگوں کیلئے اُن چیزوں کی محبت خوشنما بنادی گئی ہے جو اُن کی نفسانی خواہش کے مطابق ہوتی ہیں ،یعنی عورتیں۔(آسان ترجمہ قرآن) عورت کے جسم کی اِسی خوبصورتی اور پُرکشش ہونے کا ہی نتیجہ ہے کہ : ایک طرف عورت کو پردہ کا حکم دیا گیا اور اُسے یہ تعلیم دی گئی کہ وہ اپنی زینت کی جگہوں کو چھپائے ، غیر محرموں کے سامنے اپنی زینت کی جگہوں کو ظاہر نہ کرتی پھرے،حجاب اور پردے کا اہتمام کرے،نگاہوں کو پست رکھے اور حیاءکے زیور سے آراستہ ہو اور عفّت کی چادر کو اپنا لباس بنائے۔اور دوسری جانب مَردوں کو یہ حکم دیا گیا کہ وہ اپنی نگاہوں کو عفیف رکھیں ، پاکدامن رہیں ،شرمگاہوں کی حفاظت کریں ۔ پس گویا عورت کے جسم کی خوبصورتی اورمرد کی طبیعتوں کا اُن کی طرف میلان یہ دونوں مل کر دونوں ہی صنفوں کیلئے آزمائش کی چیز ہیں ،چنانچہ عورت کیلئے امتحان اور آزمائش کا پہلو یہ ہے کہ وہ اپنے جسم کو کس قدر چھپاکر اور پردے میں رکھتی ہے اور مَرد کیلئے امتحان اِس بات کا ہے کہ وہ اپنی نگاہ اور شرمگاہ کو کس قدر عورت کے فتنہ سے محفوط اور مامون رکھتا ہے ۔