سے اور میرے سامنے تمہارے اشکبار ہونے سے اور آہ و فغاں کرنے سے مجھے تکلیف ہوتی ہے، تمہاری سابقہ کافرانہ اور فاسقانہ حرکتوں اور بدمعاشیوں سے مجھے اذیت ہوتی ہے بلکہ فرمایا کہ تم اگر توبہ کرلو تو ہم تم کو صرف معاف ہی نہیں کریں گے بلکہ اپنا پیارا بنالیں گے۔اَلتَّائِبُ حَبِیْبُ اللہِ5؎ توبہ کرنے والا اللہ کا پیارا بن جاتا ہے۔
اس لیے توبہ کرنے کے بعد کسی کو حقیر سمجھنا حرام ہے اور حقیر سمجھنے والا سخت مجرم ہے، اندیشہ ہے کہ اس پر قیامت کے دن مقدمہ چل جائے کہ جن لوگوں نے توبہ کرلی تھی اور ہم نے ان کو اپنا پیارا بنالیا تھا پھر تم ہمارے پیاروں پر تبصرے کرتے تھے۔
تو یاد رکھو کہ اگر کسی شخص کا گناہ نظر بھی آجائے تو سوچو کہ ممکن ہے اس نے توبہ کرلی ہو اور یہ اللہ تعالیٰ کا پیارا بن گیا ہو اور اللہ کے پیاروں پر تبصرہ و تنقید کرنا خطرناک ہے۔ میرے شیخ شاہ عبدالغنی صاحب رحمۃ اللہ علیہ نے ایک صاحب سے فرمایا، جو ایک ولی اللہ کی غیبت کررہے تھے کہ اللہ والوں کی شان میں بے ادبی و گستاخی اور غیبت مت کرو، خاتمہ خراب ہوجائے گا۔اہل اللہ کی غیبت اور ان کی شان میں بدکلامی سے سوءِ خاتمہ کا اندیشہ ہے لہٰذا زبان کو خاموش رکھو۔ بالفرض اگر ان سے کوئی خطا بھی ہوگئی تو وہ ولی اللہ ہیں، نبی نہیں ہیں کیوں کہ صرف نبی معصوم ہوتا ہے، ولی سے خطا ہوسکتی ہے لیکن جب توبہ کا دروازہ کھلا ہوا ہے تو سوچو اس نے توبہ کرلی ہوگی اور اس کی توبہ اس مقام کی ہوسکتی ہے کہ جہاں تک ہماری عبادات بھی نہیں پہنچ سکتیں۔
ایک قاضئ شہر کی حکایت
حضرت سعدی شیرازی نے ایک واقعہ لکھا ہے کہ ایک قاضئ شہر نے گناہِ کبیرہ کیا اور بادشاہ کو اس کی سی آئی ڈی نے اطلاع دی کہ آج اس قاضی نے شراب بھی پی ہے اور ایک معشوق کے ساتھ گناہ کیا ہے۔ بادشاہ نے فوراً لشکر اور فوج کے ساتھ اس کے یہاں چھاپہ مارا۔ قاضی اس وقت سو رہا تھا۔ بادشاہ نے اس کے ایک لات ماری اور کہا اُٹھ نالائق! یہ بوتل
_____________________________________________
5 ؎ المغنی عن حمل الاسفار:983/2، کتاب التوبۃ،مکتبۃ طبریۃ، ریاض
