کوئی درخت اگ گیا تو نہیں (نظامِ اراضی)
عقل وبلوغ شرط نہیں
عام احکام شرعیہ میں عاقل وبالغ ہونا بھی شرط ہوتا ہے مگر زمین پر عشر کے وجوب میں یہ دونوں شرطیں نہیں ۔ زمین کا مالک اگر بچہ یا مجنوں ہو مگر زمین سے پیداوار حاصل ہوتی ہے تو اس میں عشر واجب ہوگا ان دونوں کے اولیاء پر اس کا ادا کرنا فرض ہوگا۔ بخلاف زکوٰۃ کے کہ وہ بچہ اور مجنوں کے مال میں واجب نہیں ہوتی۔(نظام اراضی)
ملکیت زمین
اسی طرح ملکیت زمین بھی وجوب عشر کے لئے شرط نہیں اس لئے اراضی وقف جن کا کوئی مالک نہیں ہوتا ان پر بھی عشر لازم ہے نیز جس شخص کی زمین اپنی نہیں کسی سے بطور عاریت کے (مانگے کے طور پر ) لے لی ہے یا اجارہ اور کرایہ پر لے لی ہے اور اس میں زراعت کرتا ہے تو پیداوار کا عشر اس شخص کے ذمہ ہے جو پیداوار حاصل کرتا ہے مالک زمین کے ذمہ نہیں ۔ علی خلاف المستأجر بین الامام وصاحبیہ(بدائع) وفی الحاوی وبقولھما نأخذ(درمختار) (نظام اراضی)
مسئلہ… مساجد ،مدارس اور خانقاہوں پر وقف شدہ اراضی کی پیداوار میں بھی عشر واجب ہوگا ۔ وکذلک الخارج من الارض الموقوفۃ علی الرباطات والمساجد یجب منہا العشر عندنا(المبسوط۳؍۵)
مسئلہ… اگر کسی شخص نے اپنی زمین کو نقد روپیہ کے عوض کرایہ ٹھیکہ پر دے دیا تو اس کی پیداوار کا عشر بقول مفتی بہ مالک زمین کے ذمہ نہیں بلکہ مقاطعہ دار (ٹھیکیدار) کے ذمہ ہے جو زمین کاشت کر کے پیداوار حاصل کرتا ہے (نظام اراضی)
مسئلہ… اگر زمین دوسرے شخص کو مزارعت یعنی بٹائی پر دی ہے کہ پیداوار میں ایک معیّن حصہ مالک زمین کا اور دوسرا معیّن کاشت کار کا مثلاً دونوں میں نصف نصف ہو یا ایک تہائی اور دوتہائی ہو اس صورت میں عشر دونوں پر اپنے اپنے حصہ پیداوار کے مطابق لازم ہوگا۔(نظام اراضی)
خلاصہ یہ کہ مفتی بہ قول کے مطابق ٹھیکہ اور بٹائی پر دی ہوئی زمینوں میں عشر پیداوار کے مالک پر واجب ہوتا ہے جو پیداوار حاصل کرتا ہے وہی عشر ادا کرتا ہے ۔ نقدی پر ٹھیکہ کی صورت میں پیداوار کا مالک ٹھیکہ دار ہوتا ہے اس لیے عشر ٹھیکہ دار کے ذمہ ہوتا ہے اور حصہ معینہ پر بٹائی کی صورت میں پیداوار کا مالک کاشت کار اور مالک زمین دونوں ہوتے ہیں ۔ اس لئے عشر بھی دونوں پر اپنے اپنے حصہ پیداوار کے مطابق لازم ہوتا ہے ۔
