ماہنامہ انوار مدینہ لاہور دسمبر 2007 |
اكستان |
 |
عرب کی کچھ منڈیاں : حضرت جنید بغدادی رحمة اللہ علیہ کا ایک واقعہ ہے اِس طرح کا، وہ فرماتے ہیں کہ میں نے منٰی میں ایک تاجر کو دیکھا جو اپنے کاروبار میں لگا ہوا تھا، عرب میں کچھ بازار اور کچھ منڈیاں زمانۂ جاہلیت سے ہر سال لگا کرتی تھیں یہ شروع ہوتی تھیں یکم ذی قعدہ سے۔ عکاذ ، مجنہ ، ذوالمجاز پھر منٰی اِس طرح سے اِن بازاروں کے نام تھے۔ یکم ذی قعدہ سے بارہ تیرہ ذی الحجہ تک تقریبًا ڈیڑھ مہینہ چالیس دن سے کچھ زیادہ یہ طائف کی طرف سے جو راستہ آتا ہے اُسی میں یہ سارے بازار لگتے تھے۔ بازار کہہ لیجیے پینٹھ کہہ لیجیے سالانہ منڈیاں کہہ لیجیے اُس میں قسم قسم کا سامان ہوتا تھا جو لوگ خرید و فروخت کرتے تھے اسلام کا جب دَور آیا تو بھی یہ رہا، یہ ایک صدی کے بعد تقریبًا ایک سو اُنیس میں یہ بازار ختم ہوئے اَب منٰی کا بازار رَہ گیا تو منٰی میں حجاج کی جو روزمرہ کی کھانے پینے کی چیزیں ہوتی ہیں وہاں اُس کا بازار لگ گیا اُن کو اِس سے سہولت ہوتی تھی باقی جو اور چیزیں ہوتی ہیں خرید و فروخت کی تو اُن کی مکہ مکرمہ میں بہت بڑی بڑی مارکیٹیں ہوگئیں ہیں اَب تو یہ صورت ہے باقی شروع اِسلام میں یہ ایک صدی سے زیادہ رہا ہے پھر ایک دَور آیا سخت خیال لوگوں کا خوارج کی قسم تھی وہ، اِن لوگوں نے یہ مارکیٹیں بند کردیں بازار بننے بند کردیے منڈیاں لگنی بند کردیں۔ ایک تاجر کا قصہ جو زَاہد تھا : حضرتِ جنید ِ بغدادی رحمة اللہ علیہ فرماتے ہیں کہ میں نے دیکھا ایک شخص کو جو دن بھر اپنے کاروبار میں لگارہا منٰی میں اور اُس کا دل خدا سے ذراسی دیر کے لیے بھی غافل نہیں ہوا اور دُوسری طرف اُنہوں نے فرمایا کہ میں نے ایک فقیر کو دیکھا جو مانگتا ہی پھرتا رہا دن بھر اور خدا کا نام لے کر خدا کا واسطہ دے کر مانگتا رہا ہے لیکن دل خدا کی طرف ذرا سی دیر کے لیے بھی نہیں بس دُوسروں کی طرف دیکھتا رہا ہے۔ زُہد دل سے ہوتا ہے : تو درحقیقت جسے زُہد کہا جائے وہ ہے ہی قلب سے تعلق رکھنے والی کیفیت تو اِس کو تعلق کس سے ہے اگر دُنیا سے ہے تو زاہد نہیں۔ اور اِس کو بڑی خطرناک چیز بتایا گیا ہے حب الدنیا رأس کل خطیئة یہ دُنیا کی محبت جو ہے ہر گناہ کی جڑ ہے ہر گناہ اِس سے نکلتا ہے تو یہ زَاہد نہ ہوا بلکہ اِس کے اُلٹ ہوا۔