مرتب : مولانا حافظ عرفان الحق اظہار حقانی
مولانا مفتی محمود اورمولانا سمیع الحق کے ہری پور جیل میں مصروفیات
عہد طالبعلمی میں مولاناسمیع الحق مدظلہ کے علمی منتخبات
۱۹۷۷ء تحریک نظام مصطفی کے دوران ہری پور جیل میں جناب شفیق الدین فاروقی کی ڈائری
قسط (۲۹)
عم محترم حضرت مولانا سمیع الحق صاحب دامت برکاتہم آٹھ نو سال کی نوعمری سے معمولات کی ڈائری لکھنے کے عادی تھے۔ ان ڈائریوں میں آپ اپنے ذاتی اور عظیم والد شیخ الحدیث حضرت مولانا عبدالحق ؒ کے معمولات شب و روز اور اسفار کے علاوہ اعزّہ و اقارب ‘ اہل محلہ و گردوپیش اورملکی و بین الاقوامی سطح پر رونما ہونے والے احوال و واقعات درج فرماتے۔ آپکی اولین ڈائری ۱۹۴۹ء کی لکھی ہوئی ہے ۔جس سے آپ کا ذوق او رعلمی شغف بچپن سے عیاں ہوتا ہے۔ احقر نے جب ان ڈائریوں پر سرسری نگاہ ڈالی گئی تو معلوم ہوا کہ جابجا دوران مطالعہ کوئی عجیب واقعہ ‘تحقیقی عبارت ‘ علمی لطیفہ‘ مطلب خیز شعر ‘ ادبی نکتہ‘ اور تاریخی عجوبہ آپ نے دیکھا تو اسے ڈائری میں محفوظ کرلیا۔ اس پر دل میں خیال آیا کہ کیوں نہ مطالعہ کے اس نچوڑ اور سینکڑوں رسائل اور ہزارہاصفحات کے عطر کشید کو قارئین کے سامنے پیش کیا جائے جس سے آئندہ آنے والی نسلیں اور اسیرانِ ذوقِ مطالعہ استفادہ کرسکیں۔تاہم یہ واضح رہے کہ نہ تو یہ مستقل کوئی تالیف ہے اور نہ ہی شائع کرنے کے خیال سے اسے مرتب کیا گیا ہے ۔ اسلئے ان میں اسلوب کی یکسانیت اور موضوعاتی ربط پایا جانا ضروری نہیں… (مرتب)
ہری پور جیل میں اسارت کے دوران درج ذیل خط بھی نذر قارئین ہے جوکہ شفیق صاحب نے الحق کے قارئین کے نام بھیجا تھا اس میں بعض اہم واقعات پر مزیدروشنی پڑتی ہے ۔
قومی اتحاد کی تحریک نفاذ شریعت کی چند روشن یادیں
۱۹۷۷ء کی تحریک نظام مصطفی پاکستان کی تاریخ کا ایک اہم ترین واقعہ ہے اس میں اللہ تعالیٰ نے سنت یوسفی پر عمل کرنے کا موقعہ دیا اور کچھ عرصہ علماء زعماء قومی رہنمائوں اور عام مسلمانوں کے ساتھ ہری پور جیل میں ابتلاء و آزمائش سے گذرنا پڑا، قائد تحریک پاکستان قومی اتحاد کے صدر مولانا مفتی محمود اور دیگر عمائدین ملک و ملت رفیق زندان تھے۔ حضرت والد ماجد قدس سرئہ نے اسارتِ زندان کے دوران ایک خط ہری پور جیل بھیجا جس میں اللہ کے دین کیلئے قید و بند کی صعوبتوں پر صبر و استقامت اور دین کیلئے سب کچھ قربان کرنے کی تلقین ہے۔یہ خط حضرت شیخ الحدیث کے خطوط بنام سمیع الحق میں ملاحظہ فرماویں۔ میرے عزیز مخلص اور سفر و حضر کے ساتھی عزیزم شفیق الدین فاروقی رفیق زندان تھے۔ انہوں نے متعلقین اور وابستگان کے نام ایک خط میں ۱۹۷۷ء کے الیکشن میں حضرت شیخ کی شرکت اور جیل میں ناچیز کے مشاغل اور پیش آمدہ بعض اہم واقعات پر تفصیل سے روشنی ڈالی تھی ضروری ہے کہ زندگی کی یہ چند روشن یادیں یہاں محفوظ کی جائیں۔خط کا پورا متن ملاحظہ فرماویں۔(سمیع الحق)
