ذرا کلیجے پہ ہاتھ رکھ کے سنو اثر داستانِ اختر
ایف جے،وائی(February 10, 2010)
جناب شاہین اقبال اثر
اشعار در محبت حبیبی و صدیقی و رفیقی وسیلة یومی وغدی مرشدی ومولائی عارف باﷲ حضرت مولانا شاہ حکیم محمد اختر صاحب ادام اﷲ ظلہم علینا
کلامِ خوشتر بہ قلب مضطر بنامِ آہ و فغانِ اختر
ہے اس میں شامل پیامِ اختر ہے اس کی زینت بیانِ اختر
جہانِ راہِ سلوک میں دل نشین ہوگا نشانِ اختر
فغانِ اختر ہے درحقیقت جریدہ ترجمانِ اختر
ہے سالکینِ رہِ طریقت میں یوں نمایاں وہ جانِ اختر
کہ چاند جیسے کہ چودھویں کا ہو ضوفشاں درمیانِ اختر
وہ راز الفت کے کھولتی ہے کہ ساری محفل یہ بولتی ہے
کہ رس سماعت میں گھولتی ہے فغانِ اختر زبانِ اختر
جوانی کیا زندگانی ساری ہمیشہ پیرانِ حق پہ واری
جبھی تو جانِ جہاں ہے پیارے وہ روحِ مرشد وہ جانِ اختر
یہی ہے حسرت یہی تمنا کہ پائے مرشد میں جان نکلے
کہ ہے مبارک کہ ہے مقدس زمینِ اختر زمانِ اختر
کہیں تو کیف و سکون بھی ہے کہیں پہ دریائے خون بھی ہے
ذرا کلیجے پہ ہاتھ رکھ کے سنو اثر داستانِ اختر
سو کام لے گا جو خوش ظنی سے سجے گا فیضانِ باطنی سے
وہ ہوگا محروم روشنی سے رہے گا جو بدگمانِ اختر
حصولِ تقویٰ ہوا ہے کھیل اب لگی ولایت کی ہول سیل اب
نہ خالی لوٹے گا کوئی گاہک کھلی ہے جب تک دکانِ اختر
ادھر ادھر کے یہاں وہاں کے کہاں کہاں کے ہیں لوگ شامل
جہاں سے خلدِ بریں کی جانب رواں ہے یوں کاروانِ اختر
حضور مرشد میں دست بستہ ہیں پیشِ خدمت حروفِ خستہ
بھلا اثر کا قلم شکستہ کہاں ہے شایانِ شانِ اختر
