Deobandi Books

عبادت:
اللہ تعالیٰ کے سامنے تذلل اور عاجزی اختیار کرنا۔
عبادلہ ثلاثہ:
فقہاء کے نزدیک حضرت عبداللہ بن مسعود، حضرت عبداللہ بن عمر اور حضرت عبداللہ بن عباس رضی اللہ عنہم کو عبادلہ ثلاثہ کہا جاتا ہے۔
عتق:
آزاد کرنا۔
عدت:
نکاح کے ختم ہونے کے بعد خواہ موت کے ذریعہ ہو یا فسخ نکاح کے ذریعہ ، ایک متعینہ مدت تک عورت کا دوسرے نکاح اور زیب و زینت سے رکا رہنا۔ عدتِ طلاق تین حیض یا تین مہینے یا وضع حمل ہے اور عدتِ وفات ۴؍مہینے دس دن۔
عرفِ عام:
وہ عرف جو مختلف علاقوں میں مروّج ہو، یعنی وہ عرف اتنا عام ہو چکا ہو کہ کسی خاص علاقے تک محدود نہ ہو، بلکہ عام طور پر لوگ اسے جانتے ہوں ۔جیسے حمام میں اجرت دے کر غسل کرنا ۔
عرفِ خاص:
وہ عرف جو خاص شہر، قبیلے یا پیشے کے لوگوں میں رواج پذیر ہو۔
عزیمت:
وہ احکام جو اصل کے اعتبارسے مشروع ہوئے ہوں ، نہ کہ کسی عارض کی وجہ سے۔جیسے وضو میں پیروں کا دھونا عزیمت ہے، اور مسح علی الخفین رخصت ہے۔
عشرۂ ذی الحجہ:
اس سے ذوالحجہ کی پہلی سے لے کر نویں تاریخ تک مراد ہے، یعنی یوں تو عشرہ کے معنی دس کے ہیں ، لیکن عربی زبان میں اکثر پر کل کا اطلاق کردیا جاتا ہے، اس لحاظ سے اسے عشرہ کہتے ہیں ۔
عفو:
نصابِ زکوٰۃ کے لیے جو درجات متعین کیے گئے ہیں ، ان کاد رمیانی حصہ مثلاً رسول اللہ ﷺ نے فرمایا: پانچ اونٹ میں ایک بکری اور دس اونٹ میں دو بکری ہے تو پانچ سے نو تک کا عدد ’’عفو‘‘ کہلائے گا۔