Deobandi Books

رجعت:
ملکیت ِ نکاح کو باقی رکھنا، خواہ زبان کے ذریعے طلاقِ رجعی دی گئی بیوی کو لوٹایا جائے، یا کسی ایسے عمل کے ذریعے جو شوہر اپنی بیوی ہی سے کرسکتا ہے۔ جیسے بوس و کنار
رخصت:
جو احکام عوارض کی بنیاد پر عارضی طور پردیے جائیں ۔جیسے مسح علی الخفین
رسول:
وہ انسان جس کو اللہ تعالیٰ نے اپنے احکام مخلوق تک پہنچانے کے لیے بھیجا ہو اور ان پر کوئی آسمانی کتاب نازل ہوئی ہو۔ 
رضاعت:
مدتِ رضاعت کے اندر عورت کے دودھ کا دودھ پینے والے کے پیٹ تک حلق کے راستے سے پہنچنا، چاہے بچہ خود دودھ چوسے یا اس کے حلق اور ناک میں ڈالا جائے۔
رکاز:
وہ مال جو زمین میں دفن ہو، چاہے خالق کی جانب سے ہو جیسے سونا چاندی، یا بندے کی جانب سے ۔جیسے دفن کیا ہوا خزانہ وغیرہ
رکن:
وہ چیز جس پر کو ئی عمل موقوف ہو اور وہ چیز اس عمل کی حقیقت میں داخل ہو۔ برخلاف شرط کے کہ اس پر بھی شئ موقوف ہوتی ہے، لیکن وہ شئ سے خارج ہوتی ہے۔رکن جیسے نماز کے لیے رکوع، سجدہ وغیرہ اور شرط جیسے نماز کے لیے وضو۔
رکوع:
نماز میں پیٹھ کے ساتھ سر کو مخصوص طریقے پر جھکانا۔
رمل:
طواف میں تیز رفتاری کے ساتھ اپنے کندھے اچکاتے اور ہلاتے ہوئے چلنا۔
رہن:
اپنے حق کے عوض کسی ایسے مال کو بطور وثیقہ کے روک رکھنا، کہ اس مال یا اس کی قیمت سے اپنا حق وصول کرسکتا ہو۔