ناخواندگی ہے باعثِ تحقیرِ زندگی
لکھ پڑھ کے اہلِ مرتبہ اے مہرباں بنو
دکھلائیو جہاں میں کمالات علم کے
شاعر بنو ادیب بنو، نکتہ داں بنو
٭
حلقہ بندی، بادہ کش، ساغر بکف
محو گردش، ساقیٔ مینا بدوش
چاندنی کا فرش، جگنو کے چراغ
اللہ اللہ اہتمام ناؤ نوش
٭
بھرتی جاتی ہے دلوں میں نفرت
شہر ویرانے ہوئے جاتے ہیں
کیا قیامت ہے الٰہی توبہ
اپنے بیگانے ہوئے جاتے ہیں
٭
دور فراعنہ سہی تشویش کیا سبب
الجھے نہ قوم بحثِ کثیر و قلیل میں
قدرت جو چاہتی ہے کسی کی بقائے زیست
دیتی ہے راستہ اسے دریائے نیل میں
٭
احناف ہیں اشاعتِ مذہب میں پیش پیش
پسماندہ خیر ہم بھی نہیں عرفِ عام میں
ترویج مسئلہ ہی میں گزری تمام عمر
الجھے رہے قراء ت خلف الامام میں
٭
میں نہیں رکھتا غرض فہم عوام الناس سے
کیوں کہ ہوں فنکار اعلیٰ شخصیت رکھتا ہوں میں
باخبر ہیں قدر و قیمت سے مری جوہر شناس
سنگریزوں میں گہر کی حیثیت رکھتا ہوں میں
٭
سامان صد نشاط و طرب غیر سود مند
تفریحِ طبع کے لیے قرآن چاہیے
ہوتا ہے ذکرِ حق سے میسر سکونِ دل
پر شرطِ اوّلیں ہے کہ ایمان چاہیے
