جانتا پہچانتا ہوں گردشِ دوراں کو میں
خانۂ دل میںجگہ دیتا ہوں اس مہماں کو میں
پیش کرتا ہوں ضیافت میں تنِ بیجاںکو میں
حال یہ ہے رو رہاہوں جنبشِ مژگاںکو میں
اس لیے ہوتے ہوئے بھی میں کوئی شاعر نہیں
درد و غم کی ایک جیتی جاگتی تصویر ہوں
جس میں ہو الجھاو ہی الجھاو وہ تقدیر ہوں
فہم ہو جس کے لیے درکار وہ تحریر ہوں
بات یہ ہے بے نیازِ شہرت و تشہیر ہوں
اس لیے ہوتے ہوئے بھی میں کوئی شاعر نہیں
یاد رکھیں پیروانِ صاحبِ خلقِ عظیم
میں ہوں رہبرؔ جادہ پیمائے صراطِ مستقیم
جان کر اسلاف کی ذی جاہ پوشاک قدیم
کرتہ سے تہبند سے مانوس ہے طبعِ سلیم
اس لیے ہوتے ہوئے بھی میںکوئی شاعر نہیں
اردو زباں
قمری و بلبل کا اسلوبِ بیاں اردو زباں
دلکش آوازِ خرام مہوشاں اردو زباں
فخرِ قوم و نازشِ ہندوستاں اردو زباں
ملکۂ عالم دلوں کی حکمراں اردو زباں
بحر حکمت کی صدف کا بے بہا درِّ یتیم
قلزمِ افکار کی موجِ رواں اردو زباں
محرمِ گل رازدارِ بو ، تلوُّن آشنا
نو بہارِ باغ کا دلکش سماں اردو زباں
ارتباط شعلہ و شبنم کامعمارِ حسیں
ہندو مسلم کے دلوں کی ترجماں اردو زباں
قند پارس کی وہاں اب گرم بازاری نہیں
غیرتِ شہد و شکر پہونچی جہاں اردو زباں
نقشِ دل ہیں شاعرِ مشرق سے لے کر تا ولیؔ
ہم نشیں ہے وجہِ یادِ رفتگاں اردو زباں
