٭
ہوا سارا جہاں آہستہ آہستہ محمدؐ کا
رواں ہے کائناتِ دہر میں سکہ محمدؐ کا
بیاں کرنے سے قاصرہے زباں رتبہ محمدؐکا
سرِ عرشِ بریں دیکھا گیا جلوہ محمدؐکا
ہوا تقسیم جب روزِ ازل پرچہ محمدؐکا
شگوفے کوملا عنوان میں روضہ محمدؐ کا
شئے معجز نما ہے اسوۂ حسنہ محمدؐ کا
ثناخواں بن گیا دنیاکاہر طبقہ محمدؐکا
خزاں کے تند جھونکوںکی ہے پیہم شعلہ افشانی
چمن ہے پھر بھی شاداب و ترو تازہ محمدؐ کا
فلک پر دوڑنے پھرنے سے فرصت ہی کہاںورنہ
مہِ تاباں بھی پہروں دیکھتا جلوہ محمدؐ کا
مذاقِ جادہ پیمائی مجھے بخشا گیا رہبرؔ
مری تقدیر نے اپنالیا رستہ محمدؐ کا
٭
پیکرِ امن و اماں صد مرحبا، خوش آمدی
موجبِ تسکینِ جاں صد مرحبا خوش آمدی
اے بہارِ بے خزاں صد مرحبا خوش آمدی
عطر آگیں داستاں صد مرحبا خوش آمدی
کاشفِ سرِّ نہاں صد مرحبا خوش آمدی
شرحِ رازِ کن فکاں صد مرحبا خوش آمدی
گل کا اظہارِ بیاں صد مرحبا خوش آمدی
شورِ بلبل سے عیاں صد مرحبا خوش آمدی
رونمائے وصف در آئینۂ شعر و سخن
حاصلِ عمرِ رواں صد مرحبا خوش آمدی
