زہے نصیب کہ مداحِ مصطفی ہوں میں
معاشیات کی تنگی ہزار ہوجائے
یہ خد وخال سے واقف نہیں جہاں ورنہ
نثار آپ پہ پروانہ وار ہوجائے
اگر جبیں پہ شکن آشکار ہوجائے
چمن چمن نہ رہے خارزار ہوجائے
رسولِ پاکؐ کی پاکیزہ تر قلمرو میں
بقیہ عمرِ رواں کا شمار ہوجائے
خیال دل میں یہ ہرگز بھی لا نہیں سکتا
گدائے کوئے نبیؐ شہریار ہوجائے
رہے گلہ ہی نہ رہبرؔ یہ بُعدِ منزل کا
صبا پہ کاش مرا اختیار ہوجائے
٭
جاگزیں قلب میں قرآں ہے رسولِ عربی
ہم پہ یہ آپ کا احساں ہے رسولِ عربی
نت نئے فتنے کا ساماں ہے رسولِ عربی
چرخ انگشت بدنداں ہے رسولِ عربی
تر بتر خوں سے مسلماں ہے رسولِ عربی
غیرت لعل بدخشاں ہے رسولِ عربی
یورشِ برقِ تپاں کا ہے تسلسل جاری
زندگی شعلہ بداماں ہے رسولِ عربی
بربریت کا یہ عالم ہے کہ میدانوں میں
جابجا شہرِ خموشاں ہے رسولِ عربی
صرف جاں ہی نہیں تلوار کی بوچھاروں میں
کفر بھی در پئے ایماں ہے رسولِ عربی
چند ساعت کے سکوں سے بھی ہے دل نامحرم
شدتِ غم سے پریشاں ہے رسولِ عربی
طعن اغیار کے یوں چبھتے ہیں دل میں گویا
تیر پیوستِ رگِ جاں ہے رسولِ عربی
کس طرح ہو درِ اقدس پہ رسائی حاصل
فکر خوش سر بگریباں ہے رسولِ عربی
فیض ہے شمعِ رسالت کی ضیاباری کا
بزمِ کونین چراغاں ہے رسولِ عربی
