٭
مستقل طور پہ ہیں تابعِ فرمانِ رسول
ربِ کعبہ کی قسم ہم ہیں غلامانِ رسول
متصف چار سے ہیں شیفتۂ آنِ رسول
جامعیت سے نوازے گئے یارانِ رسول
جلوۂ حق کی نمو چہرۂ تابانِ رسول
سیرتِ پاک ہے آئینۂ قرآنِ رسول
مثلِ خورشیدِ درخشاں کے ہے فیضانِ رسول
ذرّہ ذرّہ میںہے عکسِ رخِ تابانِ رسول
مائلِ سجدہ ہوئی کلکِ ثناخوانِ رسول
ضبطِ تحریر میں لائے ہوئے عنوانِ رسول
جادہ پیمائے فلک ہمرۂ جبریل امیں
کوئی کیا لائے تحریر میں حدِ شانِ رسول
ہر گنہگار کے ہاتھوں میں نمایاں ہوگا
اللہ اللہ رے یہ وسعتِ دامانِ رسول
مل گئی جائے رہائش نگہِ عالم میں
باعثِ فخر و مباہات ہے عرفانِ رسول
قیصریت شئے معتوب ہے ان کے نزدیک
خاکِ پاپوش سمجھتے ہیں غلامانِ رسول
روشنی جادۂ منزل کی مبارک رہبرؔ
حق کے انعامِ خصوصی میںہے قرآنِ رسول
٭
دل اس قدر تو تصور شعار ہوجائے
خوش آمدید کہے بے قرار ہوجائے
صبا کے رُخ مرا مستِ غبار ہوجائے
زیارت شہِ عالی وقار ہوجائے
وہ عطر بیز مدینے کی مست مست ہوا
کہ جس پہ صدقہ عروسِ بہار ہوجائے
گرے جو آنکھ سے حبِّ رسول میں آنسو
وہ موتیوں سے سوا آبدار ہوجائے
