ہیں سب شاہِ طیبہ کے مرہونِ منت
ایف جے،وائی(November 20, 2009)
جناب شاہین اقبال اثر
کشادہ کشادہ جبینِ مدینہ
شگفتہ شگفتہ مکینِ مدینہ
درخشاں درخشاں زمینِ مدینہ
چمکتا دمکتا مکینِ مدینہ
مدینے کی تحسین، احسن عبادت
ہیں واں جلوہ فرما حسینِ مدینہ
شہِ دیں کہ محبوبِ ربِّ جہاں ہیں
پسندیدہ رب ہے دینِ مدینہ
مکرم، معزز، مقدس، مطہر
مکانِ مدینہ مکینِ مدینہ
سُکوں بھی ہے، سکّوں کی بہتات بھی ہے
سو خوش بخت ہیں ساکنینِ مدینہ
ہیں سب شاہِ طیبہ کے مرہونِ منت
کہ ہیں دین و ایماں رہینِ مدینہ
تمہارے مقدر کا چمکا ستارہ
مبارک تمہیں حاضرینِ مدینہ
تمہاری زیارت بھی وجہ تبرک
مبارک ہو تم زائرینِ مدینہ
جو اعمالِ سنت سے نزدیک تر ہو
ہے وہ درحقیقت قرینِ مدینہ
یہ پیروئے صدیق، اثر جونپوری
تصدق، صدوقُ الامینِ مدینہ
