جگایا قوم کی تقدیر کو آواز موسیٰ نے
کیا فرعون کو غرقاب نیل اعجاز موسیٰ نے
عصائے موسوی نے پتھروں کو موم کر ڈالا
بیابانوں کو ان کے واسطے شاداب کر ڈالا
یہی وہ قوم ہے جس کے لئے کھانوں کے مینہ برسے
کہ اترے من وسلویٰ ان کی خاطر آسماں پر سے
مگر جب آزمائش آپڑی یہ قوم گھبرائی
ہوئی باطل سے خائف اور راہ حق سے کترائی
کہا موسیٰ نے اٹھ اے قوم باطل کے مقابل ہو
تیری عزت بڑھے جگ میں تیرا ایمان کامل ہو
تو بولی قوم اے موسیٰ ہمیں آرام کرنے دے
خدا کی نعمتیں ملتی ہیں ان سے پیٹ بھرنے دے
خدا کو ساتھ لے جا اور باطل سے لڑائی کر
ہمارے واسطے خود جا کے قسمت آزمائی کر
ہمیں کیوں ساتھ لے جاتا ہے دنیا سے اجڑنے کو
خدا اور اس کا پیغمبر بہت کافی ہیں لڑنے کو
ڈرایا بارہا موسیٰ نے ان کو قہر باری سے
مگر اس قوم کو مطلب رہا مطلب برآری سے
یہ جب رفعت پر آئی آہ سوجھی اس کو پستی کی
کہ چھوڑی حق پرستی اور گوسالہ پرستی کی
رکھی دنیا میں راہ ورسم حرص خام سے اس نے
دکھائی سرکشی تورات کے احکام سے اس نے
دلائی حضرت داؤد نے اس قوم کو شاہی
مگر اس نے نہ چھوڑی کم نگاہی اور گمراہی
