مرحلۂ اولیٰ
اسم کے اہم سوالات
(۱)اگر اسم ہے تو علامت اسم کیا ہے؟(۲)معرب ہے یا مبنی؟(۳)معرب ہے تو منصرف ہے یا غیر منصرف؟ اگر غیر منصرف ہے تو کون سے دو سبب ہیں ؟ (۴) اسم غیر متمکن کی کتنی قسمیں ہیں ؟ اور یہ کونسی قسم میں سے ہے؟ (۵) معرفہ ہے یا نکرہ؟ اگر معرفہ ہے تو معرفہ کی کون سی قسم؟(۶)مذکر ہے یا مؤنث؟ (۷) واحد، تثنیہ، جمع میں سے کیا ہے؟(۸) اگر جمع ہے، تو جمع قلت ہے یا جمع کثرت؟سالم ہے یا مکسر؟(۹)اسم متمکن کی سولہ قسموں میں سے کونسی قسم ہے؟ اور اعراب کیا ہے؟ (۱۰) اسمائے عاملہ کتنے ہیں اور یہ کونسی قسم ہے؟(۱۱) توابع کتنے ہیں ، اور یہ کونسی قسم ہے؟
فعل کے اہم سوالات
(۱) اگر فعل ہے تو علامت فعل کیا ہے؟ (۲) معرب ہے یا مبنی؟ مبنی ہے تو کیوں ؟ (۳) معروف ہے یا مجہول؟ اگر معروف ہے تو لازم ہے یا متعدی؟(۴) اگر متعدی ہے تو متعدی کی چار قسموں میں سے کونسی قسم؟ (۵) اگر مضارع ہے تو مرفوع، منصوب و مجزوم میں سے کیا ہے؟اوراُس کا اعراب کیا ہے؟(۶)کیا افعالِ ناسخہ (ناقصہ، مقاربہ، قلوب)، افعالِ مدح وذم اور تعجب، میں سے ہے؟ اگر ہے تو کونسی قسم؟ (۷) ثلاثی و رباعی مجرد ومزید فیہ کے کتنے ابواب ہیں ، اور یہ فعل کون سے باب سے ہے؟(۸)اگر ملحق ہے تو ملحق برباعی مجرد و مزید فیہ کے کتنے ابواب ہیں ؟اور یہ کونسے باب سے ہے؟(۹) ہفت اقسام میں سے کون سی قسم ہے؟ (۱۰) اگر مہموز،معتل و مضاعف میں سے ہے، توکیا تعلیل، تخفیف یا ادغام ہوا ہے؟ (۱۱) اس فعل کی صرف صغیر کرنے کے بعد صرف کبیر کرتے ہوئے صیغہ، بحث و ترجمہ بتاؤ۔
حرف کے اہم سوالات
(۱)اگر حرف ہے تو علامت حرف کیا ہے؟(۲) مبنی ہے یا معرب؟ (۳) حروف عاملہ میں سے ہے یا غیر عاملہ میں سے ہے؟ اگر عاملہ میں سے ہے تو کیا عمل کرتا ہے؟ اور غیر عاملہ میں سے ہے تو حروف معانی کی کونسی قسم سے تعلق رکھتا ہے؟(۴) اگر حروف عاملہ میں سے ہے تو کونسی قسم ہے؟ عاملہ در اسم ہے یادر فعل؟(۵)اگر عاملہ در اسم ہے، تو دراسم کی سات قسموں میں سے کونسی قسم ہے؟(۶)اگر مضارع پر داخل ہے تو حرف ناصب ہے یا جازم۔(۷) حروفِ معانی کتنے ہیں اور یہ کس معنیٰ میں ہے؟
مرحلۂ ثانیہ
یہ لفظ اگر معرب ہے تو مرفوعات،منصوبات اور مجرورات کتنے ہیں اور یہ ان میں سے کیا ہے؟
مرحلۂ ثالثہ
اس لفظ کا پہلے والے اور بعد والے کلمے سے (فعل فاعل، مبتداء خبر، موصوف صفت، مضاف مضاف الیہ، حال ذو الحال، ممیز تمیز، عامل معمول میں سے) کیا تعلق ہے؟ اور اس کا حکم کیا ہے؟
مرحلۂ رابعہ
(۱)یہ عبارت مرکبِ مفید ہے یا غیر مفید؟(۲) اگر مفید ہے تو جملہ اسمیہ، فعلیہ، شرطیہ، اور ظرفیہ میں سے کیا ہے؟(۳) بہر صورت جملہ خبریہ ہے یاانشائیہ؟(۴) اگر مرکب غیر مفید ہے تو اس کی تین قسموں میں سے کونسی قسم ہے؟
